ەگىس جۇمىستارىن قارجىلاندىرۋعا ءوتىنىم قابىلداۋ باستالدى

بيۋدجەتتەن كوكتەمگى ەگىس جۇمىستارىن قارجىلاندىرۋعا 140 ملرد تەڭگە ءبولىندى.

جەڭىلدەتىلگەن كرەديتتى فەرمەرلەر «اگرارلىق نەسيە كورپوراسياسى» اق ارقىلى راسىمدەي الادى، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنە سىلتەمە جاساپ.

«اگرارلىق نەسيە كورپوراسياسىنا» قارجى 70 ملرد تەڭگەدەن ەكى ترانشپەن جىبەرىلەتىن بولادى. ءبىرىنشى ترانش ءقازىر اۋدارىلدى، ەكىنشى ترانش اقپان ايىندا اۋدارىلادى.

قارجىلاندىرۋ بىرنەشە باعىت بويىنشا جۇرگىزىلەدى. اگروونەركاسىپتىك كەشەن سۋبەكتىلەرىنە تىكەلەي كرەديت بەرۋ، سونداي-اق كرەديتتىك سەرىكتەستىكتەردى، ەكىنشى دەڭگەيدەگى بانكتەردى جانە ميكروقارجى ۇيىمداردى قورلاندىرۋ ارقىلى جۇزەگە اسىرىلادى.

اگروونەركاسىپتىك كەشەن سۋبەكتىلەرى ءۇشىن سىياقى مولشەرلەمەسى مىناداي:

بانك كەپىلدىگى ارقىلى تىكەلەي كرەديت الاتىن بولسا، جىلدىق مولشەرلەمە 1،5%-دان اسپايدى؛

كرەديتتىك سەرىكتەستىكتەر، ميكروقارجى ۇيىمدارى، ەكىنشى دەڭگەيدەگى بانكتەر قارجىلاندىرعان كەزدە جىلدىق مولشەرلەمە 5%-دان اسپايدى.

2023 جىلى باعدارلامانىڭ شارتى بويىنشا كرەديتتەۋ مەرزىمى كەلەسى جىلدىڭ كوكتەمىنىڭ باسىنا دەيىن ۇزارتىلدى.

ايتا كەتەرى، بۇرىن كرەديتتەۋ مەرزىمى قارجىلاندىرۋ جىلىمەن شەكتەلىپ كەلگەن بولاتىن.

بيۋدجەتتىك قارجىلاندىرۋ ەسەبىنەن كەمىندە 2 ميلليون گەكتار ەگىس القابىن قامتۋ جوسپارلانىپ وتىر.