ەگيپەتتەگى كۋرورتتا اكۋلانىڭ شابۋىلىنان ەكىنشى ايەل مەرت بولدى

اۆستريالىق تۋريست جاعالاۋعا جاقىن جەردە ءجۇزىپ جۇرگەن

ەگيپەتتىڭ حۋرگادا قالاسىنا جاقىن ورنالاسقان كۋرورتىندا رۋمىنيالىق تۋريست اكۋلانىڭ شابۋىلىنان قازا تاپتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

AlArabiya سايتىنىڭ مالىمەتەتىنشە، رۋمىنيا سىرتقى ىستەر مينيسترلىگىنىڭ مالىمەتىنشە، 3 شىلدەدە تۋريستىك كومپانيا وكىلى كايردەگى رۋمىنيا ەلشىلىگىنە حۋرگادادا دەمالىپ جۇرگەن ايەلدىڭ ءولىمى تۋرالى حابارلاعان.

«ەگيپەتتىڭ قۇزىرلى بيلىگى ۇسىنعان اقپاراتقا سايكەس، تەرگەۋ رۋمىنيا ازاماتىنىڭ اكۋلا شابۋىلىنان قازا تاپقانىن انىقتادى»، - دەلىنگەن مينيسترلىك حابارلاماسىندا.

ءقازىر قازا تاپقان ءتۋريستىڭ جەكە-باسى انىقتالىپ، وتباسىنا حابار بەرىلىپ جاتىر.
ءدال وسىنداي جاعداي رۋمىنيالىق ءتۋريستىڭ ءمايىتى تابىلعانعا دەيىن بىرنەشە ساعات بۇرىن بولعان ەدى. 68 جاستاعى اۆستريالىق ەليزابەت سكۆاير اكۋلا شابۋىلىنان كەيىن كوز جۇمدى. ەكى وقيعا دا ساحل-حاشيش بۇعازىندا، بىر-بىرىنەن 600 مەتر قاشىقتىقتا بولدى. كۋاگەرلەردىڭ ايتۋىنشا، اۆستريالىق تۋريست جاعالاۋعا جاقىن جەردە ءجۇزىپ جۇرگەن.

وسى وقيعادان كەيىن ەگيپەت بيلىگى قىزىل تەڭىزدەگى جاعالاۋ ۋچاسكەسىن جاۋىپ تاستادى. سۋداعى سپورت تۇرلەرىنە تىيىم سالىندى. بالىق اۋلايتىن قايىقتارعا دا حۋرگادا جاعالاۋىندا جۇزۋگە رۇقسات ەتىلمەيدى.

مينيسترلىك قازا تاپقانداردىڭ وتباسىنا كوڭىل ايتىپ، قۇزىرلى كوميتەتتىڭ قازىرگى تاڭدا كۋرورت ماڭىندا اكۋلانىڭ ءجۇرۋ سەبەبىن تەرگەپ جاتقانىن ءمالىم ەتتى.

جالپى، سوڭعى جىلدارى قىزىل تەڭىزدە اكۋلانىڭ ادامدارعا شابۋىلداۋى سيرەك بولعان. 2020 جىلى اكۋلا شابۋىلىنان ۋكرايندىق بالا قولىنان، ەگيپەتتىك گيد اياعىنان ايىرىلعان. ال، 2018 جىلى جىرتقىش قىزىل تەڭىز جاعاجايىندا چەح ءتۋريسىن مەرت قىلدى. وسىنداي وقيعا سالدارىنان 2015 جىلى نەمىس ءتۋريسى قازا تاپقان بولاتىن.