جوبا 2030 جىلعا قاراي ىسكە اسادى
بيىل قازان ايىنا دەيىن الماتىنىنىڭ تولە بي كوشەسىندەگى جەدەل رەلستى ترامۆاي جولىن دامىتۋ بويىنشا شەشىم شىقپاق. ال 2030 جىلعا قاراي الماتى-2 ستانساسىنان قونايەۆ قالاسىنا دەيىن ەلەكتر پويىزى ىسكە قوسىلماق. بۇل تۋرالى الماتى اكىمى ەربولات دوسايەۆ 2025-2030 جىلدارعا ارنالعان دامۋ جوسپارىن قوعامدىق كەڭەس مۇشەلەرىمەن تالقىلاۋ بارىسىندا مالىمدەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
مەگاپوليس باسشىسى قالانى كەشەندى دامىتۋ 12 باعىتتا جۇرەدى دەدى. 2025-2030 جىلعا قاراي شاھاردى بەس ورتالىققا ءبولىپ، بارلىعىندا الەۋمەتتىك نىساندار 15 مينۋتتىق جەردە بولۋى قاراستىرىلادى. اسىرەسە قوعامدىق كولىكتەردى دامىتۋعا كوڭىل بولىنبەك. 800 جاڭا اۆتوبۋس الىنادى، گازبەن جۇرەتىن قوعامدىق كولىكتەر ءۇشىن ەكى پارك پەن 5 گاز قۇيۋ بەكەتى سالىنادى.
«باتىس باعىتتا ءۇش جاڭا مەترو ستانساسى سالىنادى. الماتى مەتروسىن ودان ءارى دامىتۋدىڭ اياسىندا سولتۇستىك باعىتتا الماتى-1 تەمىر جول ۆوكزالىنا دەيىن مەترونى دامىتۋ بويىنشا ۇسىنىستار دايىندالادى. بيىل قازان ايىنا دەيىن تولە بي كوشەسىندەگى لرت-نى دامىتۋ جونىندەگى شەشىم قابىلدانادى»، – دەدى الماتى قالاسىنىڭ اكىمى ەربولات دوسايەۆ.
سونداي-اق ەربولات دوسايەۆ جىل سوڭىنا دەيىن اگلومەراسيالاردى دامىتۋدىڭ جاڭا جوسپارى قابىلداناتىنىن مالىمدەدى. سونىڭ اياسىندا ەكولوگيا، كولىك ينتەگراسياسى، الەۋمەتتىك ينفراقۇرىلىم مەن جۇمىس ورىندارىنىڭ قۇرىلۋى سياقتى ماسەلەلەر شەشىلمەك.
«قالا مەن قالا ماڭىنداعى كولىك بايلانىستى جاقسارتۋ ءۇشىن ءبىز قوسىمشا جاڭا 30 مارشرۋت، قوسىمشا الماتى-2 ستانساسىنان قونايەۆ قالاسىنا دەيىن ەلەكتر پويىزىن ىسكە قوسامىز. الماتى-3 تەمىر جولى ۆوكزالىنىڭ قۇرىلىسىن باستايمىز. ەڭ كوپ كۇش تۇسەتىن كىرۋ ماگيسترالدارىن 2025 جىلعا دەيىن قۇلجا تاركتىسى مەن بورالداي-شامالعان تراكتىسىن، 2030 جىلعا دەيىن تالعار تراكتىسى مەن جوعارى قاسكەلەڭ تراكتىسىن كەڭەيتەمىز»، – دەدى الماتى قالاسىنىڭ اكىمى ەربولات دوسايەۆ.
كەشەندى دامۋ باعىتتارىن اتاي كەلە، شاھار باسشىسى الماتىنى دامىتۋ تۋرالى جوسپارعا تۇرعىنداردىڭ 63 پايىزى وڭ پىكىر بىلدىرگەنىن تىلگە تيەك ەتتى. ەسكە سالساق، بۇعان دەيىن مەگاپوليستىڭ دامۋ جوباسى 27 ماۋسىم مەن 1 شىلدە ارالىعىندا قوعامنىڭ تالقىسىنا سالىندى. وسى ۋاقىت ارالىعىندا تۇرعىنداردان 1200-دەن اسا ۇسىنىس كەلىپ تۇسكەن. قالا حالقى كوبىنە جاڭا مەترو باعىتتارىن اشۋ، جۇمىسسىزدىقتى جويۋ، ءجۇرىپ-تۇرۋعا جايلى جاعداي جاساۋ، ەكولوگيا سياقتى ماسەلەلەردى كوتەرگەن. وتىرىس كەزىندە قوعامدىق كەڭەس وكىلدەرى ەلدى تولعاندىرعان تۇيتكىلدەردى جەتكىزىپ، اكىمنەن تىكەلەي جاۋاپ الدى.
«ەندى قاراستىرامىز دەدى. جاتاقحانالاردى قوعامدىق كەڭەس وكىلدەرىمەن ارالاپ، جاتاقحانالاردىڭ جايىن ايتتى. اعاش وتىرعىزۋعا بايلانىستى ماسەلە كوتەرىلدى. الماتىعا قانداي اعاشتار جەرسىنەدى، سول تۋرالى مىنا بوتانيكالىق باقتىڭ وكىلدەرىمەن كەلىسىپ، سۇراستىرىپ قاراپ كورەيىك دەدى»، – دەدى قوعامدىق كەڭەس مۇشەسى تالعات جانىسباي.
«مەن دە ءبىر ماسەلەن كوتەرسەم بە دەپ وتىرمىن. دەنساۋلىققا بايلانىستى. ءبىزدىڭ ەلىمىز جان باسىنا شاققاندا جۇرەك-قان تامىر اۋرۋلارىنان الەمدە الدىڭعى ورىن الادى. بۇنىڭ باستى سەبەبى ەلدەگى ەمدەۋ جۇيەسىنىڭ قاتەلىكتەرىنەن بولىپ وتىر. دارى-دارمەك تەك شامامەن 30 پايىز كومەكتەسەدى ەكەن. ال قالعانى دارىگە قاتىسى جوق. اۋرۋدىڭ الدىن الۋ كەرەك»، – دەدى قوعامدىق كەڭەس مۇشەسى ەركىن راقىشيەۆ.
كەزدەسۋ بارىسىندا قالا باسشىسى قوعامدىق كەڭەس مۇشەلەرىن اتقارىلار شارۋالاردى ءبىر جەڭنەن قول، ءبىر جاعادان باس بولىپ بىرىگىپ شەشۋگە شاقىردى. شاھاردى دامىتۋ جوسپارى الداعى 2 اي بويى تالقىعا تۇسەتىن بولادى. ۇسىنىس، تىلەكتەر مەن نەگىزگى باعىتتار 5 قىركۇيەكتە ناقتى بەكىتىلمەك. قالالىقتار جوبامەن الماتى دامۋ ورتالىعىنىڭ رەسمي سايتىنان تانىسا الادى.