قازاقستان پرەمەر-مينيسترى ولجاس بەكتەنوۆ ەۋرازيالىق دامۋ بانكىنىڭ باسقارما ءتوراعاسى نيكولاي پودگۋزوۆپەن كەزدەسۋ وتكىزدى. ينۆەستيسيالىق ءوزارا ءىس-قيمىلدى كەڭەيتۋ جانە ەادب-نىڭ ينفراقۇرىلىمدىق جوبالاردى ىسكە اسىرۋعا قاتىسۋى ماسەلەلەرى قارالدى.
ولجاس بەكتەنوۆ پەن نيكولاي پودگۋزوۆ ەۋرازيالىق دامۋ بانكىنىڭ قازاقستانداعى جوعارى ينۆەستيسيالىق بەلسەندىلىگىن اتاپ ءوتتى. جىل باسىنان بەرى ەادب $900 ملن-نان اساتىن سوماعا ەكونوميكانىڭ ءتۇرلى سەكتورلارىنداعى جوبالاردى قارجىلاندىردى. سونىمەن قاتار 2023 جىلى قازاقستانعا $1 ملرد قاراجات سالىندى. وسى جىلدىڭ قورىتىندىسى بويىنشا ينۆەستيسيا كولەمى ەداۋىر ارتىپ، $1،4-$1،6 ملرد-قا جەتەدى دەپ كۇتىلۋدە.
قازاقستاندا ىسكە اسىرىلىپ جاتقان ەادب نەگىزگى جوبالارىنىڭ تىزبەسىندە – كومىر ءوندىرۋدىڭ سيكلدىك-اعىندىق تەحنولوگياسىن ەنگىزۋ، كۇن ەلەكتر ستانسالارىن سالۋ، «استراحان – ماڭعىشلاق» ماگيسترالدى سۋ قۇبىرىن رەكونسترۋكسيالاۋ جانە كەڭەيتۋ، اۆتوجولداردى سالۋ جانە رەكونسترۋكسيالاۋ جوبالارى بار.
ولجاس بەكتەنوۆ ەۋرازيالىق دامۋ بانكى ماڭىزدى سەرىكتەستەردىڭ جانە ينۆەستيسيالاردىڭ سەنىمدى كوزدەرىنىڭ ءبىرى بولىپ سانالاتىنىن اتاپ ءوتتى.
«مەملەكەت باسشىسى قازاقستان حالقىنا جولداۋىندا ءبىرىنشى كەزەكتەگى ينفراقۇرىلىمدىق ماسەلەلەردى شەشۋ مىندەتتەرىن اتاپ ءوتتى. ءقازىر ۇكىمەت ينجەنەرلىك، كولىك، الەۋمەتتىك جانە سيفرلىق ينفراقۇرىلىمدى جاڭعىرتۋ جانە سالۋ بويىنشا اۋقىمدى جۇمىس جۇرگىزىپ جاتىر. ءبىز بانكپەن ءوزارا ءتيىمدى شارتتارمەن ىنتىماقتاستىقتى كەڭەيتۋگە دايىنبىز جانە ەل ەكونوميكاسى ءۇشىن ماڭىزدى جوبالاردى بىرلەسىپ ىسكە اسىرۋعا مۇددەلىمىز»، — دەپ اتاپ ءوتتى ولجاس بەكتەنوۆ.
ءوز كەزەگىندە ەادب ءتوراعاسى نيكولاي پودگۋزوۆ بانكتىڭ ءىرى ينۆەستيسيالىق جوبالاردى جۇزەگە اسىرۋداعى ءوزارا ءىس-قيمىلدى نىعايتۋعا دايىن ەكەنىن مالىمدەدى.
سونداي-اق تاراپتار بانكتىڭ اعىمداعى ينۆەستيسيالىق پورتفەلى، كاپيتال قۇرىلىمىن ءارتاراپتاندىرۋ، كورپوراتيۆتىك باسقارۋ ساپاسىن ارتتىرۋ ماسەلەلەرىن تالقىلادى.
انىقتاما:
ەۋرازيالىق دامۋ بانكى – 2006 جىلى قۇرىلعان حالىقارالىق قارجى ۇيىمى. بانكتىڭ جارعىلىق كاپيتالى $7 ملرد قۇرايدى. اعىمداعى ينۆەستيسيالىق پورتفەلدىڭ سالالىق قۇرىلىمى: ەنەرگەتيكا – 21،7%، كولىك – 18،1%، تاۋ-كەن ونەركاسىبى – 27،5%، قارجى سەكتورى – 9،2%، ينفراقۇرىلىم – 5،8%، ماشينا جاساۋ – 2،8%، اگروونەركاسىپ كەشەنى – 3،3%، حيميا ونەركاسىبى – 7،3%، قۇرىلىس – 1،1%% ، باسقا سالالار – 3،2%-دى قۇرايدى.