الەم بىرىنشىلىگى 7-14 مامىر ارالىعىندا وتەدى.
دزيۋدودان قازاقستان ەرلەر جانە ايەلدەر قۇراما كوماندالارى قاتار استاناسى دوحادا وتەتىن الەم چەمپيوناتىنا قاتىسادى، دەپ حابارلايدى اlmaty-akshamy.kz.
قازاقستان دزيۋدو فەدەراسياسىنىڭ باسپا ءسوز قىزمەتى ءمالىم ەتكەندەي، قازىرگى تاڭدا ۇلتتىق قۇراما سپورتشىلارى الەم چەمپيوناتى الدىنداعى قورىتىندى وقۋ-جاتتىعۋ جيىنىنا قاتىسىپ جاتىر. قازاقستان ەرلەر قۇراماسىنىڭ باس باپكەرى نۇربول سۇلەيمەنوۆ سپورتشىلاردىڭ الەم چەمپيوناتىنا قالاي ىرىكتەلگەنى تۋرالى ايتتى.
«الەم چەمپيوناتى – ماۋسىمنىڭ ەڭ ماڭىزدى جارىستارىنىڭ ءبىرى. ءبىزدىڭ مىندەتىمىز وسى جارىسقا بارىنشا دايىندالىپ، سپورتشىلاردى جاقسى فورماعا كەلتىرۋ بولدى. الەم بىرىنشىلىگىنە سپورتشىلار ءار سالماق بويىنشا وسى ماۋسىمداعى كورسەتكىشتەرىنە قاراي ىرىكتەلدى. قۇراما سپورتشىلارى جىل باستالعاننان بەرى بىرنەشە گران پري، Grand Slam جارىسىنا قاتىستى جانە قۇراما سورتشىلارى جىل باسىنان بارلىق جارىستا جۇلدەگەرلەر قاتارىنان كورىندى. وسىنداي ناتيجەگە قاراي باپكەرلەر قۇرامى الەم چەمپيوناتىنا قاتىساتىن قۇرامانى جاساقتادى. ناتيجەسىندە، دوحا تاتاميىندە ەل نامىسىن اعا بۋىن وكىلدەرى دە، جاس دزيۋدوشىلار دا قورعايتىن بولادى.
ءقازىر الماتى وبلىسىنداعى وليمپيادالىق دايارلاۋ ورتالىعىندا جاتتىعۋدىڭ سوڭعى كەزەڭدەرىن وتكىزىپ جاتىرمىز. مۇندا كۇش كورسەتكىشتەرى بويىنشا، تەحنيكا مەن تاكتيكا بويىنشا كوپ جۇمىستى جەتىلدىرەمىز. الەم چەمپيوناتى جىلدىڭ ەڭ ماڭىزدى دوداسى بولعانىمەن، ودان كەيىن ءبىزدى استانادا وتەتىن Grand Slam جارىسى كۇتىپ تۇر. ءوز جەرىمىزدە وتەتىن الەمدىك باسەكەدە جاقسى ناتيجەگە قول جەتكىزۋ ءۇشىن بىزگە الەم چەمپيوناتىنان جاراقاتسىز، ابىرويمەن ورالۋ اسا ماڭىزدى»، - دەيدى قازاقستان ەرلەر قۇراماسىنىڭ باس باپكەرى نۇربول سۇلەيمەنوۆ.
دوحادا وتەتىن دزيۋدودان ەرلەر مەن ايەلدەر اراسىنداعى الەم چەمپيوناتىنا قاتىساتىن قازاقستان قۇراماسىنىڭ ءتىزىمى كەلەسىدەي:
ەرلەر: ەلدوس سمەتوۆ، نۇرقانات سەرىكبايەۆ (60 كەلى)، عۇسمان قىرعىزبايەۆ (66 كەلى)، جانساي سماعۇلوۆ، دانيار شامشايەۆ (73 كەلى)، ابىلايحان جۇبانازار (81 كەلى)، ديدار حامزا، ايدار اراپوۆ (mix team، 90 كەلى)، نۇرلىحان شارحان (100 كەلى)، عالىمجان قىرىقباي (100 كەلىدەن جوعارى سالماق دارەجەسى).
ايەلدەر: ابيبا ءابۋجاقىنوۆا، عاليا تىنبايەۆا (48 كەلى)، تولعاناي ابەۋوۆا (52 كەلى)، باقىت قۇساقبايەۆا (57 كەلى)، ەسميگۋل كۋيۋلوۆا (63 كەلى)، اناستاسيا ماياكوۆا (70 كەلى)، ارۋنا جانگەلدينا (78 كەلى)، كاميلا بەرلىقاش، اقەركە رامازانوۆا (78 كەلىدەن جوعارى سالماق دارەجەسى).
ايتا كەتەرلىگى، دوحادا وتەتىن الەم چەمپيوناتى پاريج وليمپياداسى الدىنداعى سوڭعى الەم بىرىنشىلىگى بولىپ سانالادى. جارىس ناتيجەسى بويىنشا سپورتشىلاردىڭ الەم جانە وليمپيادا رەيتينگتەرىنە ءتيىستى ۇپايلار ۇلەستىرىلەدى. اتاپ ايتقاندا، الەم چەمپيونى 2000، كۇمىس جۇلدەگەر 1400، ال قولا جۇلدەگەر 1000 ۇپايدان ەنشىلەيدى.