دزيۋدودان قازاقستان جاستار قۇراماسى ەۋروپا كۋبوگىن التى مەدالمەن اياقتادى

قازاقستاندىق جاس دزيۋدوشىلار ەۋروپا كۋبوگىنەن التى مەدال ۇتىپ الدى، دەپ حابارلايدى Almaty-akshamy.kz Olympic.kz-كە سىلتەمە جاساپ.
اۆستريانىڭ گراس قالاسىندا دزيۋدودان جاستار اراسىندا ەۋروپا كۋبوگى ءوتتى. قازاقستان جاستار قۇراماسى اتالعان دودانى ەكى التىن، ەكى كۇمىس جانە ەكى قولا مەدالمەن اياقتادى. 
اتاپ ايتقاندا، جاستار ۇلدار قۇراماسىنان 60 كەلىدە نۇرقانات سەرىكبايەۆ، 66 كەلىدە نۇرسۇلتان زايزاعالييەۆ جارىستا قارسىلاس شاق كەلتىرگەن جوق. 60 كەلىدە مەرەي مارحانبەتوۆ پەن قىزدار اراسىندا 78 كەلىدەن جوعارى سالماقتا بەلدەسكەن ايدا تويشىبەكوۆا ەۋروپا كۋبوگىنىڭ كۇمىس جۇلدەسىنە يە بولدى. ال ۇلدار اراسىندا 81 كەلىدە تاتاميگە شىققان ماكسيم مەيىرلان مەن قىزدار اراسىندا 63 كەلىدە ب ا ق سىناعان ەسميگۇل كۋيۋلوۆا قورجىندى قوس قولامەن تولىقتىردى. 
ناتيجەسىندە، قازاقستان جاستار قۇراماسى اۆستريادا وتكەن ەۋروپا كۋبوگىن جالپى كوماندالىق مەدال كەستەسىندە جاپونيادان كەيىنگى ەكىنشى ورىنعا تۇراقتادى.
ايتا كەتەرلىگى، قازاقستان جاستار ۇلدار قۇراماسىن اعا جاتتىقتىرۋشىلار ازامات مۇقانوۆ مەن ايبەك يماشيەۆ جاتتىقتىرسا، قىزدار كومانداسىن ارسەن حاتيپ پەن نۇربەك مىقتىبەكوۆ باپتاپ باردى.