بيلەت قۇنى وزگەرىسسىز قالدى
پەتروپاۆل-ەسىلكول، پەتروپاۆل-ماكۋشينو باعىتىنداعى ەلەكتر پويىزدارىنىڭ قوزعالىسى 8 ماۋسىمنان باستاپ قالپىنا كەلەدى. بيلەت قۇنى وزگەرىسسىز قالدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
سولتۇستىك قازاقستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە، 2020 جىلدىڭ 17 مامىرى كۇنى پاندەمياعا وراي رەسەيمەن بايلانىستىراتىن پەتروپاۆل-ماكۋشينو، پەتروپاۆل-ەسىلكول باعىتىنداعى ەلەكتر پويىزدارىنىڭ قوزعالىسى توقتاتىلدى. ەندى 8 ماۋسىمنان باستاپ ولاردىڭ قوزعالىسى قايتا قالپىنا كەلتىرىلمەك. ءتيىستى شەشىم قابىلداندى.
«2021 جىلدىڭ جەلتوقسان ايىندا ءبىز كەلىسىمشارت جاساستىق. كونكۋرستا جاڭا تاسىمالداۋشى جەڭىسكە جەتتى. ول نۇر-سۇلتان قالاسىنان «ليدەر-ەلەكتروسەرۆيس» ءجشس-ى. كومپانيا «رەسەي تەمىر جولدارى» اق بارلىق ءتيىستى كەلىسىمشارتقا وتىردى. ويتكەنى بار ينفراقۇرىلىم جالعا الىنادى، «قازاقستان تەمىرجولى» ءوزىنىڭ جىلجىمالى قۇرامىن بۇل جەردە - پەتروپاۆلدا قولدانا المايدى. تۇراقتى توك جانە اۋىسپالى توك دەگەن تۇسىنىك بار. تۇراقتى توك تەك رەسەيلىك جىلجىمالى قۇرامعا عانا قولدانىلادى»، - دەيدى سقو جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى ميرحات ءابىلماجىنوۆ.
بيلەت قۇنى تۇرعىنداردىڭ قالتاسىن قاقپاۋى ءۇشىن بيىل بيۋدجەتتەن ەلەكتر پويىزدارىن سۋبسيديالاۋعا قارجى ءبولىندى. ول شامامەن 250 ملن تەڭگە.
ياعني بيلەت قۇنى وزگەرىسسىز قالماق. قاجەت بولعان جاعدايدا قوسىمشا قاراجات تا بولىنەدى.
«تۇرعىنداردان وسى باعىتتارعا ەلەكتر پويىزدارىن جىبەرۋدى سۇراعان ءوتىنىش وتە كوپ ءتۇستى. كوپشىلىككە ول جاقىن ماڭداعى ەلدى مەكەندەردەن وبلىس ورتالىعىنا جۇمىسقا جەتۋگە ىڭعايلى. سونداي-اق رەسەيدەگى تۋعان-تۋىستارىنا دا بارىپ-كەلۋگە كولىكتىڭ وسى ءتۇرىن تاڭدايدى. ەلەكتر پويىزدارىنىڭ ءجۇرۋ كەستەسى جانە جولاۋشىلار بيلەتىنىڭ باعاسى وزگەرمەيدى. الەۋمەتتىك ماڭىزدى تاريف ساقتالادى. بۇل باعىتتارعا كۇندەلىكتى جۇرەدى، ماسەلەن ەسىلكولگە كۇنىنە ەكى رەت ەلەكتر پويىزى بارادى. ال ماكۋشينوعا تاۋلىگىنە ءبىر رەت ەلەكتر پويىزى جولعا شىعادى، تاڭەرتەڭ وبلىس ورتالىعىنان شىعىپ، كەشكە قايتىپ كەلەدى»، - دەيدى ميرحات ءابىلماجىنوۆ.