ابۋ-دابيدە ارداگەرلەر اراسىندا دزيۋدودان الەم چەمپيوناتىنا الماتىلىقتار دا قاتىستى.
ابۋ-دابيدە ارداگەرلەر اراسىندا دزيۋدودان الەمدىك بىرىنشىلىك اياقتالدى، دەپ حابارلايدى Almaty-akshamy.kz.
ۇيىمداستىرۋشى - حالىقارالىق دزيۋدو فەدەراسياسى. قازاقستاندىقتار الەمنىڭ 64 كومانداسى اراسىندا جالپى كوماندالىق ەسەپتە 3-ورىنعا يە بولدى.
اقش، برازيليا، جاپونيا، كورەيا جانە ت.ب ەلدەردەن 1000 - نان استام ارداگەر سپورتشىلار قاتىستى. بۇل جارىسقا بارىپ-كەلگەن ەكى الماتىلىق- مارات مىرزالييەۆ جانە سەرىك مامەتيازوۆپەن سويلەسۋ مۇمكىندىگى تۋدى.
مارات - 63 جاستا، سەرىك - 48 جاستا. ولار قازاقستاندا جىل سايىن ارداگەرلەر اراسىندا جاس بويىنشا دزيۋدودان بىرىنشىلىك وتكىزىلەتىنىن ايتتى. جۇلدەگەرلەر الەم چەمپيوناتىنا قاتىسا الادى. دزيۋدودا ارداگەرلەر جارىسىنا 35 جاستان باستاپ رۇقسات ەتىلەدى. سونداي - اق، سالماق پەن جاس بويىنشا بولىنەدى - 45-49 جاس، 50-54، 60-65، 66-73، 74-80، 81-85.
مارات ءوزىنىڭ قازىرگى سپورتشى جانە جاتتىقتىرۋشى ەكەنىن ايتتى. ول «Do star» كلۋبىن قۇرعان، وندا قالانىڭ دزيۋدو ارداگەرلەرى جينالادى. كلۋب بايزاقوۆ-شيەۆچەنكودا ورنالاسقان سپورت مەكتەبىنىڭ زالىن ءوز ەسەبىنەن جالعا الادى. اپتاسىنا 5 كۇن جاتتىعادى. جەكسەنبىدە-مەدەۋدە كروسس-جۇگىرۋ، نەمەسە فۋتبول، باسكەتبول، باسسەين وتەدى. ءابۋ - دابيدە قازاقستان قۇراماسىندا 20 الماتىلىق بولدى. ولار ابىرويمەن ونەر كورسەتتى. ءبىر التىن، ءبىر كۇمىس جانە ەكى قولا مەدال جەڭىپ الدى. التىن مەدال - ايتىموۆ ناسرەدديندە، كۇمىس-مامەتيازوۆ سەرىك جانە قولا-مىرزالييەۆ مارات پەن قوڭىربايەۆ جانىبەككە بۇيىردى.
قازاقستاننىڭ باسقا قالالارىنان دا قۇراما دزيۋدوشىلارى لايىقتى ونەر كورسەتتى. كۇرەس زالىندا ەلىمىزدىڭ ءانۇرانى سەگىز رەت شىرقالدى. سوڭعى كۇنگە دەيىن ءبىزدىڭ ەرلەر كومانداسى ءبىرىنشى ورىندا بولدى. جالپى كوماندالىق ەسەپتە ەرلەر مەن ايەلدەر كوماندالارىنىڭ قاتىسۋى ەسكەرىلدى. بىزدە ايەلدەر كومانداسى بولعان جوق. فرانسۋز ايەلدەرى 3 مەدال جەڭىپ الدى جانە فرانسيا قۇراماسى جالپى كوماندالىق ەسەپتە ءبىرىنشى بولدى. برازيليا قۇراماسى ەكىنشى، قازاقستان ءۇشىنشى ورىنعا يە بولدى. 64 كوماندانىڭ ىشىندە بۇل - تاماشا ناتيجە، سپورتشىلار قازاقستاندى لايىقتى تۇردە تانىستىردى.
ارداگەر دزيۋدوشىلار - مارات پەن سەرىك اعالارىمىز ءوز قاراجاتتارىنا زال جالداپ، وندا بالالاردى تەگىن جاتتىقتىرادى. دەگەنمەن ارداگەر سپورتشىلار جوعارى جاقتان، مينيسترلىك تارىپىنان وزدەرىنە قولداۋ، دەمەۋشىلىك جوعىن ايتىپ،قىنجىلادى. ەل اتىن سىرتتا تانىستىرىپ جۇرگەن سپورتشىلار وسى جاعىنا كوڭىل بولىنسە دەپ تىلەيدى.