الماتىلىق نەيروحيرۋرگتار 35 جاستاعى ناۋقاستىڭ ميىنداعى ۇلكەن ەپيلەپتوگەندى وشاقتى الىپ تاستاپ، ونى ەپيلەپسيادان قۇتقاردى، دەپ حابارلايدى almaty-akshamy.kz
ورتالىق قالالىق كلينيكالىق اۋرۋحانا نەيروحيرۋرگتارى العاش رەت فارماكورەزيستەنتتىك ەپيلەپسياسى بار ناۋقاسقا وتە كۇردەلى وتا جاسادى - ميدىڭ ساماي بولىگىنىڭ رەزەكسياسىمەن سول جاق اميگدالوحيپپوكامپەكتوميا.
ناۋقاس اتالعان دەرتپەن 20 جاسىنان اۋىرعان. سوڭعى ۋاقىتتا ناۋقاسقا ۇستاماعا قارسى پرەپاراتتار كومەكتەسپەگەن. جاعدايدىڭ ۋشىققانى سونشالىق، ۇستامالار توقتاماستان بىرىنەن سوڭ ءبىرى بولاتىن بولعان.
دارىگەرلەر بارلىق قاجەتتى تەكسەرۋ جۇرگىزگەن. مرت ناۋقاستىڭ ميىنىڭ سول جاق ساماي بولىگىندە ەپيلەپتيفورمدى بەلسەندىلىكتىڭ وشاعىن انىقتادى.
نەيروحيرۋرگيا بولىمىشەسىنىڭ مەڭگەرۋشىسى مارات الماتوۆ نوۆوسيبيرسكتەن كەلگەن نەيروحيرۋرگ الەكساندر دميترييەۆپەن بىرلەسە وتىرىپ، شەبەرلىك سىنىبى اياسىندا، نەيروناۆيگاسيا جانە مي قىرتىسىن تىكەلەي جازۋ ارقىلى ەلەكتروكورتيكوگرافيا كومەگىمەن ناۋقاستىڭ سول جاق گيپپوكامپىن ميكروحيرۋرگيالىق جولمەن الىپ تاستاۋ وپەراسياسىن جاسادى.
«ديامەترى 3*3 سم بولاتىن ۇلكەن وڭ جاق ماڭداي بولىگىندەگى ەپيلەپتوگەندى وشاقتى الىپ تاستادىق. وتا ناۋقاستا نيەۆرولوگيالىق جەتىسپەۋشىلىك تۋىنداتپاي، ءساتتى ءوتتى. وتادان كەيىن ناۋقاستا ەپيلەپتيكالىق ۇستاما تىركەلمەدى. جاسالعان وتا ناۋقاستىڭ ءومىر ءسۇرۋ ساپاسىن جاقسارتادى دەپ ۇمىتتەنەمىز»، - دەيدى مارات الماتوۆ.
ميعا وتا جاساۋ، جالپى كەز كەلگەن ارالاسۋ جۇرگىزۋ وتە كۇردەلى شەشىم ەكەنى بەلگىلى. بۇنداي وتا كەزىندە ءارقاشان دا تاۋكەلگە بەل بۋىپ، جۇمىستى ۇلكەن جاۋاپكەرشىلىكپەن جانە اسقان ساقتىقپەن جاساۋ قاجەت.
الماتوۆتىڭ ايتۋى بويىنشا، ەپيلەپسيا - كەڭىنەن تارالعان جانە وتە كۇردەلى نيەۆرولوگيالىق اۋرۋ، ول مي بولىكتەرىنە ۇلكەن زاقىم كەلتىرەدى.
اۋرۋ پاتوگەنەزى ميدىڭ نەيروندارىندا ۇستامانى تۋدىراتىن پاروكسيزمالدى رازريادتارعا نەگىزدەلگەن.
اۋرۋدىڭ سەبەبى تولىعىمەن زەرتتەلمەگەن، ەپيلەپسيا تۋا بىتكەن بولۋى مۇمكىن، مي قۇرىلىمىنداعى وزگەرىستەرگە نەگىزدەلۋى مۇمكىن نەمەسە كەز كەلگەن باس-مي جاراقاتىنان سوڭ پايدا بولۋى مۇمكىن.
اتالعان وتا ناۋقاسقا ءمامس شەڭبەرىندە جاسالدى.