Aleem! ەلدەن جىراقتا جۇرگەن قازاق جاستارى جاساپ شىعارعان اعىلشىن ءتىلىن ۇيرەتەتىن پەرسوناليزاسيالانعان پلاتفورما وسىلاي اتالادى. باستاپقىدا ول Telegram-دا ميني-قوسىمشا رەتىندە تانىلىپ، قىسقا ۋاقىت ىشىندە وتە جىلدام تارالىپ، ەرەكشە تانىلدى. وسىنداي سەرپىندى App Store-دا قايتالادى. نەبارى 72 ساعات ىشىندە پلاتفورما 150 000 قولدانۋشى جيناپ، ورگانيكالىق ءوسىمنىڭ ەرەكشە مىسالىنا اينالدى. ءتىپتى بۇكىل الەمگە تانىلعان "Duolingo"-نى شاڭ قاپتىرىپ كەتتى. كەيىنگى بىر-ەكى اپتا كولەمىندە تەحنولوگيا سالاسىندا ەل مەرەيىن اسقاقتاتقان جوبا جايلى Aqshamnews.kz ءتىلشىسى ىزدەنىپ كوردى.
قازىرگى تاڭدا Aleem كومانداcىندا 8 ادام جۇمىس ىستەيدى. ولاردىڭ ءارقايسىسى وقۋمەن بىرگە جوبانى دا "كەلىستىرىپ ءجۇر". كوماندا مۇشەلەرىنىڭ بۇعان دەيىن اتقارعان ىستەرى ءارتۇرلى، ءبىراق ولاردىڭ ءبارىن ءبىر ماقسات توعىستىرعان، ول - ءتيىمدى ءارى قولجەتىمدى ءبىلىم الۋ يدەياسى.
اليدار كۇچۋكوۆ - CEO، 17 جاسىنان بەرى ستارتاپتار جاسايتىن كانىگى كاسىپكەر. ونىڭ بلوكچەين نەگىزىندەگى اشىق قايىرىمدىلىق پلاتفورماسى 150 000 دوللار ينۆەستيسيا تارتقان. ءقازىر ول بار نازارىن Aleem-گە اۋدارىپ وتىر.
اسىلجان التاي - CMO، اعىلشىن ءتىلىن ءوز بەتىنشە وقۋدى ۇيرەتەتىن GEETENG ونلاين-مەكتەبىنىڭ تەڭ قۇرىلتايشىسى. بوستاندا Hult International Business School-دا گرانتتا وقيدى. نازاربايەۆ زياتكەرلىك مەكتەبىنىڭ تۇلەگى، 700 مىڭنان استام جازىلۋشىسى بار كونتەنت جاساۋشى.
بەردىبەك ساپاربەكوۆ - COO، Johns Hopkins ۋنيۆەرسيتەتىندە وقيدى، قازاقستانداعى SAT جانە IELTS بويىنشا ەڭ ءىرى مەكتەپتەردىڭ ءبىرىن قۇرعان (ايلىق اينالىمى - 47 000$).
تەمىرلان امانجانوۆ - CTO، تولىق گرانتتا وقيتىن NYU ستۋدەنتى (400 000$). Ace.it جانە باسقا دا ءبىلىم بەرۋ پلاتفورمالارىنىڭ نەگىزىن قالاعان.
تەمىرلان تەمىربايەۆ - founding engineer، قازاقستانداعى ەڭ ءىرى Web3 حاكاتوننىڭ جەڭىمپازى.
كرەاتيۆ كومانداسى:
- الەن التاي - كرەاتيۆتى ديرەكتور، كانالى 300 ملن-نان استام قارالىم جيناعان اۆتور، GEETENGء-نىڭ تەڭ قۇرىلتايشىسى.
- امال سادەكوۆا - UX/UI-ديزاينەر، UPROCK-تا تاعىلىمگەر.
- اييا جۇماعالييەۆا - Parsons School of Design ستۋدەنتى، سۋرەتشى جانە ديزاينەر.
كوماندانىڭ بەرگەن مالىمەتىنە قاراعاندا، ولاردىڭ جاساپ شىعارعان بۇل قوسىمشاسى قازاقستان، وزبەكستان،تاجىكستان، تۇركمەنستان جانە ءازىربايجان بويىنشا ءبىرىنشى ورىندا، مولدوۆا، رەسەي، بەلارۋس ەلدەرى بويىنشا ەكىنشى ورىندا جانە توعىز مەملەكەت بويىنشا توپ 10-عا كىرگەن: ونىڭ ىشىندە ءباا بار. ولار امەريكادا ماركەتينگ جاساماسا دا، 55-ورىنعا شىققان.
Aleem قوسىمشاسىن جاساۋ يدەياسى بيىلعى جىلدىڭ كوكتەمىندە دۇنيەگە كەلگەن ەكەن. اليدار كۇچۋكوۆ ورتالىق ازياداعى ەڭ ءىرى اعىلشىن مەكتەبىنىڭ نەگىزىن قالاۋشىسى، دوسى اسىلجان التايمەن اڭگىمەلەسۋ بارىسىندا اعىلشىن ءتىلىن رەپەتيتور سياقتى ءتيىمدى، ءبىراق ميلليونداعان ادامعا قولجەتىمدى ەتىپ ۇيرەتەتىن پلاتفورمانى جاساپ كورسە قالاي دەگەن وي كەلەدى.
2024 جىلى ولاردىڭ GetEnglish (GETENG) مەكتەبى 4000+ ستۋدەنت وقىتىپ، 100 000 دوللار تازا تابىسقا جەتكەن ەدى. ءبىر جىلدىق ۇزىلىستەن سوڭ اليدار جاڭا ءونىم يدەياسىن قايتا قولعا الدى.
جازدا كوماندا Telegram-دا العاشقى MVP - speaking-بوتتى جاسايدى. ءبىر اي ىشىندە ول 40 000 قولدانۋشى جينادى. باستاپقىدا دوستار قولدانادى دەپ ويلاعان جوبا كۇتپەگەن ورگانيكالىق وسىمگە يە بولدى.
App Store-عا شىعارعاندا، كوماندا وعان ۇلكەن ءۇمىت ارتپاعان. ءبىراق ناتيجە كوماندانىڭ ءوزىن تاڭ قالدىرعان: 72 ساعاتتا 150 000 قولدانۋشى قوسىلعان. ەشقانداي جارناما قولدانىلماعان.
اعىلشىن ءتىلىن ۇيرەنۋ نارىعىندا ءقازىر باسەكە كوپ. ءبىراق Aleem كومانداسى يننوۆاسيانىڭ ءتىپتى ەڭ تولعان سالالاردا ەشكىم كۇتپەگەن كەزدىڭ وزىندە پايدا بولاتىنىن دالەلدەدى. كوماندا مۇشەلەرى اعىلشىن ءتىلىن ۇيرەنۋدە باستارىنان وتكىزبەن تاجىريبەگە سۇيەنىپ، ءتىل وقىتۋ جۇيەسىنىڭ كەمشىلىكتەرىن جاقسى ءبىلدى. قىمبات كۋرستار، ەسكىرگەن باعدارلامالار، بەيىمدەلمەگەن ادىستەمە. ولار بۇل تۋرالى
اليدار:
"سول كەزدە تۇسىندىك: ماسەلە ادامداردا ەمەس، جۇيەدە".
بەردىبەك:
"ادامداردىڭ قارقىنى مەن قابىلەتى ءارتۇرلى، ءبىراق سوعان قاراماي، بارىنە بىردەي باعدارلاما بەرىلەدى".
ولار وزدەرى ريەۆوليۋسيا جاسادىق دەپ سانامايدى، جوبا تەك وقىتۋدى جەڭىلدەتكىسى كەلگەن ويدان تۋىنداعان.
بەردىبەك تاعى ءبىر نارسەنى اتاپ ءوتتى.
"ءبىز ChatGPT مەن YouTube-پەن وسكەن بۋىنبىز. بۇل - ونى تۇسىنگەن ادامعا تەگىن ۋنيۆەرسيتەت. ءبىزدىڭ جاستاعى كوپتەگەن كاسىپكەرلەر - وزدىگىنەن ىزدەنىپ، ۇيرەنگەندەر. 19 جاسىمىزدا جۇيە قۇرىپ، كوماندا باسقارا الدىق. ءبىر قۋانتاتىنى، ءقازىر قازاقستاندا 16-22 جاس ارالىعىنداعى فاۋندەرلەر قاۋىمداستىعى جىلدام ءوسىپ كەلەدى".
Aleem پلاتفورماسىنىڭ تارتىمدىلىعى - ونىڭ قاراپايىمدىلىعىندا. پلاتفورما قولدانۋشىعا تىم كوپ جۇكتەمە ارتپايدى كۇردەلىلىكتى اۆتوماتتى تۇردە بەيىمدەيدى، قاتەلەردى تۇسىنىكتى ەتىپ كورسەتەدى جانە وقۋ پروسەسىن تىم قيىنداتپايدى.
"ءبىز وقۋ پروسەسىن جەڭىل ءارى ەركىن ەتكىمىز كەلدى"، - دەيدى بەردىبەك.
يدەيادان ونىمگە دەيىنگى جول جانە جاڭا نارىقتارعا باعىت
كوماندا تىلدەر سانىن كوبەيتۋگە اسىقپايدى. الدىمەن قازاق تىلىندەگى نۇسقانى شىعارۋ نەگىزگى باسىمدىق بولىپ تۇر.
بەردىبەك:
"الدىمەن اعىلشىن ءبولىمىن ءوزىمىز تولىق قاناعات ەتەتىن دەڭگەيگە جەتكىزەمىز"
الداعى جوسپار:
- قازاقشا - اعىلشىنشا
- يسپانشا - اعىلشىنشا (لاتىن امەريكاسى - الىپ نارىق)
- كارىسشە - اعىلشىنشا
- جۇڭگو، تۇرىك، اراب تىلدەرى
ينجەنەرلىك كوماندا جۇيەنىڭ تىلدەردى جىلدام قوسۋعا مۇمكىندىك بەرەتىن ارحيتەكتۋراسىن جاساپ جاتىر.
قازىرگى ماقسات - ساپانى جوعالتپاي اۋقىمدى كەڭەيتۋ. كوماندا جاڭا كونتينەنتتەرگە اسىقپايدى، نەگىزگى ءونىم يدەالدى دەڭگەيگە جەتكەننەن كەيىن عانا كەڭەيۋدى جوسپارلايدى.
دەگەنمەن، Aleemء-نىڭ امبيسياسى وتە ايقىن:
"ءبىز مىڭداعان نەمەسە ءجۇز مىڭداعان ەمەس، ميلليونداعان، ءتىپتى، ميللياردتاعان ادام قولدانا الاتىن وقۋ جۇيەسىن جاساعىمىز كەلەدى".
Aleemء-نىڭ ميسسياسى - الەمدى "مويىنداتۋ".
Aleem - ءبىلىمدى بارشاعا قولجەتىمدى ەتۋدى ماقسات ەتكەن جاڭا بۋىن پلاتفورماسى. كوماندا جەكە تاجىريبەدەن تۋعان قيىندىقتاردى شەشۋدى، ءتىل ۇيرەنۋدى ۇزاق ءارى قىمبات پروسەسس ەمەس، ءتيىمدى جانە بارشاعا لايىقتى جۇيەگە اينالدىرۋدى كوزدەيدى.
Aleem - قازاقستانداعى تەحكاسىپكەرلىكتىڭ جاڭا ءداۋىرىنىڭ سيمۆولى. كوماندا جاس، يدەياسى باتىل، ال ميسسياسى ايقىن:
ادامداردىڭ ەكران الدىنداعى ۋاقىتىن بىلىمگە اينالدىرۋ جانە الەم بويىنشا ءتىل ۇيرەنۋدىڭ جاڭا ستاندارتىن قۇرۋعا جۇمساسا دەگەن نيەتتەن تۋعان.