الماتى قالاسىندا پوليسەيلەر جابايى ساۋدانىڭ الدىن الۋ، اباتتاندىرۋ ەرەجەلەرىنىڭ ساقتالۋىن باقىلاۋ جانە قوعامدىق ورىنداردى لاستاۋ فاكتىلەرىن انىقتاۋ ماقساتىندا كەشەندى رەيدتىك ءىس-شارالار جۇرگىزدى، - دەپ حابارلايدى aqshamnews.kz.
قالاداعى ءىرى كيىم-كەشەك بازارلارىنىڭ ءبىرىنىڭ ماڭىندا زاڭسىز قويىلعان ساۋدا نۇكتەلەرى انىقتالىپ، بارلىعى تولىقتاي جويىلدى. اۋماق تازارتىلىپ، ءتارتىپ ورناتىلدى. ءبىر عانا رەيدتىڭ ناتيجەسىندە 80-نەن استام ازامات اكىمشىلىك جاۋاپكەرشىلىككە تارتىلدى. ولاردىڭ اراسىندا ءوز تەرريتورياسىندا ءتيىستى ءتارتىپتى قامتاماسىز ەتپەگەنى ءۇشىن بازار اكىمشىلىگى دە بار.
- مۇنداي ءىس-شارالار “زاڭ جانە ءتارتىپ” باسىم باعىتى اياسىندا جانە مينيستر جاريالاعان پروفيلاكتيكا جىلىنا سايكەس جۇيەلى تۇردە وتكىزىلىپ كەلەدى. ءبىزدىڭ مىندەتىمىز - مەگاپوليستە قۇقىق ءتارتىبىن قامتاماسىز ەتۋ، تازالىقتى ساقتاۋ جانە تۇرعىندار ءۇشىن ءقاۋىپسىز، قولايلى جاعداي قالىپتاستىرۋ. سانيتارلىق جانە قوعامدىق قاۋىپسىزدىككە ءقاۋىپ توندىرەتىن كەز كەلگەن قۇقىقبۇزۋشىلىققا الداعى ۋاقىتتا دا باتىل توسقاۋىل قويىلادى، - دەدى الماتى قالاسى پد جەرگىلىكتى پوليسيا قىزمەتى باسقارماسىنىڭ باستىعى اسحات قۇلبايەۆ.
قالا اۋماعىندا ءتارتىپ ورناتۋ جانە ستيحيالىق ساۋدانىڭ جولىن كەسۋ باعىتىنداعى جۇمىستار جۇيەلى تۇردە جالعاسادى. پوليسيا دەپارتامەنتى زاڭسىز ساۋدا مەن اۋماقتى لاستاۋ تۇرعىندارعا قولايسىزدىق تۋعىزاتىنىن، سونداي-اق قالانىڭ سانيتارلىق جانە قوعامدىق قاۋىپسىزدىگىنە ەلەۋلى قاتەر توندىرەتىنىن ەسكەرتەدى. پوليسيا كاسىپكەرلەر مەن قالا تۇرعىندارىن اباتتاندىرۋ قاعيدالارىن جانە زاڭ تالاپتارىن ساقتاۋعا شاقىرادى. ويتكەنى ءاربىر ازاماتتىڭ جاۋاپكەرشىلىگى – قالانىڭ تازالىعى مەن ءتارتىبىنىڭ باستى كەپىلى.