يزنيك قالاسىندا وتكەن IV دۇنيەجۇزىلىك كوشپەندىلەر ويىندارى ءوز مارەسىنە جەتتى
دۇنيەجۇزىلىك كوشپەندىلەر ويىنى 2024 جىلى قازاقستاندا وتەدى. بۇل تۋرالى ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ ءوزىنىڭ Facebook پاراقشاسىندا جازدى، دەپ حابارلايدى Almaty-akshamy.kz.
«سىزدەرگە تۇركيادان ءسۇيىنشى حابار جەتكىزگىم كەلەدى. كەشە عانا تۇركيانىڭ سپورت ءمينيسترى مەحمەت كاساپوگلۋ ق ر مادەنيەت جانە سپورت ءمينيسترى داۋرەن اسكەربەك ۇلى ابايەۆقا كەلەسى، V دۇنيەجۇزىلىك كوشپەندىلەر ويىندارىن وتكىزۋ ەستافەتاسىن تاپسىردى. ياعني كەلەسى ويىندار 2024 جىلى قازاقستاندا وتەدى.
ال يزنيك قالاسىندا وتكەن IV دۇنيەجۇزىلىك كوشپەندىلەر ويىندارى ءوز مارەسىنە جەتتى. الەمدىك دودادا ءبىزدىڭ سپورتشىلارىمىز ۇلتتىق سپورتتىڭ تۋىن جىقپاي، ايتۋلى ناتيجەلەرگە قول جەتكىزدى.
ماسەلەن، كوشپەندىلەر ويىندارىنىڭ باعدارلاماسىنا تۇڭعىش ەنگەن كوكپاردا قازاقستان التىن جۇلدەلەردى ەنشىلەدى. جارىس بارىسىندا ءبىزدىڭ قۇراما وزبەكستان مەن موڭعوليا قۇرامالارىنان ءوتىپ، اقتىق ويىندا قىرعىزستان قۇراماسىن 4:3 ەسەبىمەن جەڭدى.
سونداي-اق، باتىرىمىز مارات نىعماتۋللايەۆ 60 كەلى سالماقتا قازاق كۇرەسىنەن التىن جۇلدەنى يەلەنسە، 65 كەلىگە دەيىنگى سالماق دارەجەسىندەگى التىندى زارينا ساريپوۆا جەڭىپ الدى.
بۇعان دەيىن قازاقستان ءداستۇرلى ساداق اتۋ مەن جامبى اتۋدان كۇمىس جۇلدەلەردى ەنشىلەگەن.
كوشپەندىلەر ويىندارىنىڭ ناتيجەلەرى بويىنشا قازاقستان قۇراماسىنىڭ قورجىنىندا 3 التىن، 3 كۇمىس، 2 قولا جۇلدەسى بار. بۇل تاماشا ناتيجەنى كەلەسى كوشپەندىلەر ويىندارىندا ەسەلەۋ - ۇلتتىق سپورت قاۋىمداستىعىنىڭ كەلەسى 2 جىلداعى ماقساتى دەپ بىلەمىن.
ەل نامىسىن اقتاعان بارلىق سپورتشىلارىمىزدى شىن جۇرەكتەن قۇتتىقتايمىن!»، - دەپ جازدى يسلامبەك سالجانوۆ.