شەتەل ازاماتىنا پاتەردى جالعا بەرەردە نەنى ەسكەرۋ كەرەك؟

پاتەر يەسى ءۇش جۇمىس كۇنى ىشىندە شەتەل ازاماتى جونىندە ميگراسيالىق پوليسياعا حابار بەرۋى ءتيىس

قازاقستان تۇرعىندارى شەتەلدىكتەرگە زاڭسىز ءۇي جالعا بەرگەنى ءۇشىن جازاعا تارتىلۋى مۇمكىن. ولار ەسكەرتۋ الىپ قانا قويماي، 92 مىڭ تەڭگەگە دەيىن ايىپپۇل ارقالايدى، دەپ حابارلايدى Almaty-akshamy.kz informburo.kz-كە سىلتەمە جاساپ. 

پاتەردى قالاي زاڭدى بەرەدى

1. ميگراسيالىق پوليسياعا حابارلاڭىز.

پاتەر يەسى شەتەل ازاماتى كەلسە، ءۇش جۇمىس كۇنى ىشىندە ول جونىندە ميگراسيالىق پوليسياعا حابار بەرۋى ءتيىس:

vmp.gov.kz — ق ر ۆيزا-ميگراسيا پورتالى، ەسق بولسا؛
E-qonaq ارقىلى؛
حقكو، ءوزىڭىز تۇراتىن جەردەگى ميگراسيالىق پوليسياعا بەرىلەدى.
ايتپەسە، قۇزىرلى ورگان ەسكەرتۋ جىبەرەدى.

سونىمەن قاتار، ميگراسيالىق زاڭنامانى بۇزعان شەتەلدىككە پاتەر جالعا بەرگەندەرگە قولدانىلاتىن جازا بار. العاشىندا 25 اەك (76،5 مىڭ تەڭگە) ايىپپۇل سالادى. بۇل ارەكەت ءبىر جىل ىشىندە قايتالانسا، 30 اەك (91،9 مىڭ تەڭگە) تولەۋگە تۋرا كەلەدى.

قازاقستان اۋماعىندا ءجۇرۋ مەرزىمىن ساقتاماعان بوتەن ەلدىڭ ازاماتى دا جازاسىز قالمايدى:

ءۇش تاۋلىك – ەسكەرتۋ؛
ۇشتەن بەس تاۋلىككە دەيىن – 31 800 تگ (10 اەك).
قازاقستاندا 10 تاۋلىكتەن ارتىق زاڭسىز جۇرسە، 79،5 مىڭ تگ ايىپپۇل ارقالايدى نە ەلدەن شىعارىلادى.

2. ۋاقىتىن سوزۋ مۇمكىندىگىن ەسكەرە وتىرىپ، 90 كۇننەن اسپايتىن مەرزىمگە كەلىسىمشارت جاساۋ قاجەت.

"شەتەلدىككە باسپانا جالعا بەرۋ ەل تۇرعىنىنا بەرۋدەن ەرەكشەلەنبەيدى. ءبىراق ۇيىڭىزگە رەسەيلىك قونىستانسا، ەلدە ۆيزاسىز ءجۇرۋ مەرزىمىن ەسكەرۋ كەرەك. سوندىقتان ونىڭ ۋاقىتشا تۇرۋعا رۇقسات الۋىنا بايلانىستى ۋاقىتىن سوزۋ مۇمكىندىگىن ەسكەرە وتىرىپ، 90 كۇننەن اسپايتىن مەرزىمگە كەلىسىمشارت جاساۋعا كەڭەس بەرەمىن"، – دەيدى Krisha.kz زاڭگەرى باقىت قاسىمبەكوۆ

قۇرامىنا ءبىزدىڭ ەلدەن بولەك رف، بەلارۋس، قىرعىزستان جانە ارمەنيا كىرەتىن ەەو ازاماتتارى 90 كۇن، باسقا رەسپۋبليكا ازاماتتارى 30 كۇن ەلدە تۇرا الادى. سودان كەيىن قازاقستاننان كەتۋگە، ال تاعى ءبىراز قالعىسى كەلسە، ۋاقىتشا تۇرۋعا رۇقسات الۋعا مىندەتتى.

رۇقسات مىناداي جاعدايدا بەرىلەدى: وتباسىمەن تابىسۋ، وقۋ، ەمدەلۋ، بيزنەس-يمميگراسيا، ميسسيونەرلىك قىزمەت.