ەلورداداعى «QAZAQSTAN» جەڭىل اتلەتيكا سپورت كەشەنىندە تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەربول مىرزابوسىنوۆتىڭ توراعالىعىمەن ۇلتتىق سپورت تۇرلەرىن دامىتۋ جانە 2024 جىلعا ارنالعان مىندەتتەر بويىنشا القالى جيىن ءوتتى.
ءىس-شارا بارىسىندا كەلەسى جىلى استانادا ۇيىمداستىرىلاتىن 5ء-شى دۇنەجۇزىلىك كوشپەندىلەر ويىندارىنىڭ دايىندىق بارىسى ءسوز بولدى، دەپ حابارلايدى اlmaty-akshamy.kz. ءتول سپورتىمىزدى دارىپتەۋگە ارنالعان باسقوسۋعا ۇلتتىق جانە ات سپورتى ورتالىعىنىڭ ديرەكتورى باقداۋلەت ءسابيتوۆ، ۇلتتىق سپورت قاۋىمداستىعىنىڭ وكىلدەرى، ۇلتتىق سپورت فەدەراسيالارىنىڭ پرەزيدەنتتەرى، وڭىرلىك سپورت باسقارمالارىنىڭ باسشىلارى، ايماقتارداعى ۇلتتىق سپورت مەكتەپتەرى مەن كلۋبتارىنىڭ باسشىلارى جانە «قازسپورتينۆەست» اق ماماندارى قاتىستى. جيىندا ءسوز العان ەربول مىرزابوسىنوۆ ۇلتتىق سپورت – ۇلتتىق قۇندىلىعىمىزدىڭ، ۇلتتىق مادەنيەتىمىزدىڭ ءبىر بولىگى ەكەنىن ايتا كەلىپ، ۇلتتىق سپورت تۇرلەرىن ودان ءارى دامىتۋ جانە حالىقارالىق ارەناعا شىعارۋ باستى مىندەت ەكەنىن جەتكىزدى.
«ۇلتتىق سپورت تۇرلەرىنەن اككرەديتتەلگەن سپورت فەدەراسيالارىمەن بىرلەسە وسى باعىتتا ءبىرقاتار ءىس-شارالار اتقارىلۋدا. بيىل ۇلتتىق سپورتتىڭ بىرنەشە تۇرىنەن الەم جانە ازيا چەمپيوناتتارى، الەم جانە ازيا كۋبوگى، دۇنيەجۇزىلىك جاۋىنگەرلىك ونەر ويىندارى سىندى ءىرى جارىستار وتكىزىلدى. سپورتشىلاردىڭ ناتيجەسى جامان ەمەس. ءبىراق الدا تۇرعان مىندەتتەر كوپ. بۇگىنگى تاڭدا سونىڭ ەڭ باستىسى – 2024 جىلعى V دۇنيەجۇزىلىك كوشپەندىلەر ويىندارىن ابىرويمەن وتكىزۋ. ۇزدىك ناتيجەگە قول جەتكىزۋ ءۇشىن مىقتى دايىندىق قاجەت. بارشاڭىزدى الداعى كوشپەندىلەر ويىندارىن جوعارى دەڭگەيدە وتكىزۋگە اتسالىسۋعا شاقىرامىن»، - دەدى ەربول مىرزابوسىنوۆ.
كۇن تارتىبىندە تۇرعان ۇلتتىق سپورت تۇرلەرىنەن رەسپۋبليكالىق فەدەراسيالاردىڭ اتقارعان جۇمىستارى مەن العا قويعان جوسپارلارى، رەسپۋبليكا بويىنشا ۇلتتىق سپورتتىڭ دامۋى، 5ء-شى دۇنيەجۇزىلىك كوشپەندىلەر ويىندارىنا دايىندىق بارىسى، ۇلتتىق سپورت تۇرلەرىن دامىتۋ جانە ءار ءتۇرلى ماسەلەلەر بويىنشا فەدەراسيا باسشىلارى، ۇلتتىق جانە ات سپورتى ورتالىعىنىڭ ديرەكتورى، «قازسپورتينۆەست» اق پرەزيدەنتىنىڭ ورىنباسارلارى بايانداما جاسادى. ءاربىر فەدەراسيا اتقارعان جۇمىستارىنا ەسەپ بەرىپ، ۇلتتىق سپورتتىڭ الەۋەتىن ارتتىرۋ ماقساتىندا ۇسىنىستار ايتتى. جيىن سوڭىندا ۇلتتىق سپورت تۇرلەرىنىڭ وزەكتى ماسەلەلەرى تالقىلانىپ، وڭ شەشىم تابۋ ءۇشىن بارلىق فەدەراسيا بىرلەسە جۇمىس اتقارۋعا ۋاعدالاستى.