بۇگىن ساۋد ارابياسى كورولدىگىنىڭ استاناسى ار-ريادتا دۇنيەجۇزىلىك جاۋىنگەرلىك ونەر ويىندارىنىڭ رەسمي اشىلۋى ءوتتى. Green Halls كەشەنىندە وتكەن اۋقىمدى ءىس-شارادا قاتىسۋشى 80-نەن استام مەملەكەتتىڭ وكىلدەرىنە ءتۇرلى قويىلىمدار، جەكپە-جەك تۇرلەرىنىڭ ەرەكشەلىگى جايلى كورىنىستەر ۇسىنىلدى، دەپ حابارلايدى اlmaty-akshamy.kz.
«ەلىمىزدە جەكپە-جەك تۇرلەرى جوعارى دەڭگەيدە دامىپ جاتىر. ونىڭ ۇستىنە حالىقتىڭ باسىم بولىگى اتالعان سپورتتى تۇراقتى باقىلاپ وتىرادى. بوكس، دزيۋدو، كاراتە، كيكبوكسينگ پەن ارمرەستلينگتەن ءىرى جارىستاردا ۇلتتىق قۇرامامىز ۇزدىك وندىقتا جۇرەدى. ساۋد ارابياسىنداعى بۇل كەشەندى جارىسقا دەلەگاسيا جاقسى دايىندىقپەن كەلدى. كەي سپورت تۇرلەرىنەن الەم چەمپيوناتىمەن قاتار كەلگەنىنە قاراماستان، باسەكەگە قابىلەتتى كوماندا جاساقتادىق»،-دەدى تسم سپورت جانە دەنە شىنىقتىرۋ ىستەرى كوميتەتىنىڭ مامانى، ءارى قازاقستان دەلەگاسياسىنىڭ جەتەكشىسى كەلبەت نۋرعازينا.
بۇل ويىندارعا قازاقستان 9 سپورت تۇرىنەن 53 اتلەتتەن دەلەگاسيا جاساقتاپ الىپ كەلدى. الداعى كۇندەرى العاشقى جۇلدە جيىنتىعىن سامبوشىلار ساراپقا سالادى. ءقازىر بوزكىلەم شەبەرلەرى سالماق ولشەپ، ەرتەڭگى جۇلدە جولىنداعى جەكپە-جەكتەرىنە دايىندالىپ جاتىر.
«الەم چەمپيوناتىنا از ۋاقىت قالدى. سوعان قاراماستان وسىندا كوپتەگەن سالماقتا مىقتى سپورتشىلاردى الىپ كەلدىك. ەرلەر مەن ايەلدەر ءۇشىن دە جەرەبە جولداس بولعان جوق. سوعان قاراماستان جاقسى ناتيجە كورسەتۋگە شاما-شارقىمىز جەتەدى. اتاپ ايتار بولسام، جاۋىنگەرلىك سامبودا ادىلبەك سەيىسوۆ (64 كگ)، اسقار ابدۋللا (98 كگ)، ال سپورتتىق سامبودا ساعىنىش ءالىپباي (71 كگ)، تەمىرلان كولباي ەلگە جۇلدەمەن ورالادى دەگەن سەنىمدەمىز»،-دەدى سامبودان ۇلتتىق قۇرامانىڭ باس باپكەرى ءبىرجان يماقوۆ سپورتتى دامىتۋ ديرەكسياسىنىڭ باسپا ءسوز قىزمەتىنە بەرگەن سۇحباتىندا.
جالپى ار-ريادتاعى ويىندار باعدارلاماسىندا 16 سپورت ءتۇرى بار. بۇل قاتارداعى دزيۋدو، تاەكۆوندو، كۇرەس، سەمسەرلەسۋ مەن بوكس وليمپيادا ساناتىندا. سونداي-اق ايكيدو، ارمرەستلينگ، دجيۋ-دجيتسۋ، كاراتە، كەندو، كيكبوكسينگ، تاي بوكسى (مۋاي-تاي)، سامبو، ساۆات (فرانسۋز بوكسى)، سۋمو مەن ۋشۋ بار. بۇل كەشەندى جارىستىڭ (World Combat Games) تاريحى 2010 جىلدان باستاۋ الادى. العاش رەت قىتايدىڭ استاناسى بەيجىڭدە 27 تامىز بەن 4 قىركۇيەك ارالىعىندا وتكەن ويىنداردا سپورتتىڭ 13 تۇرىنەن ۇزدىكتەر انىقتالعان. قازاقستان دەلەگاسياسى 9 سپورت تۇرىنەن 45 اتلەت اپارىپ، 1 التىن، 2 كۇمىس، 3 قولا مەدالگە يە بولعان.
التىن – ەرلان تلۋمبەتوۆ (69 كگ، دجيۋ-دجيتسۋ)؛
كۇمىس – نۇرلان تلۋمبەتوۆ (77 كگ، دجيۋ-دجيتسۋ)،
ارمان سانسەربين (68 كگ، سامبو)،
ارمان شىلمانوۆ (+80 كگ، تاەكۆوندو)؛
قولا – ازامات نۇرپەيىسوۆ (75 كگ،
كيكبوكسينگ (فۋلكونتاكت) نۇربولات سەنگەروۆ (82 كگ، مۋايتاي)،
جۇماگەلدى جەتپىسبايەۆ (70 كگ، پانكراتيون).
ودان كەيىن اراعا 3 جىل سالىپ كەزەكتى سانكت-پەتەربۋرگ قالاسى الىپ، 15 سپورتتان 135 جۇلدە جيىنتىعىنىڭ يەگەرلەرىن انىقتاپ بەرگەن. ەلدەن بارعان 5 سپورت تۇرىنەن 20 جەكپە-جەك شەبەرى 2 قولا جۇلدەگە قول جەتكىزگەن. ولار: تىلەۋعابىل امانتورييەۆ (62 كگ، دجيۋ-دجيتسۋ)، جانسەرىك ءامىرجانوۆ (67 كگ، مۋايتاي).
سوسىن، ءبىرشاما ۋاقىت بويى كەزەكتى دودانى ۇيىمداستىرۋدىڭ رەتى تۇسپەدى. جان-جاقتى كەلىسسوزدەردەن كەيىن تايبەيگە سول مۇمكىندىك بەرىلگەنىمەن، ول دا كەيىنگە شەگەرىلدى. ال IV باسەكە 2021 جىلى قازاقستاننىڭ باس قالاسى استانادا وتۋگە ءتيىس بولعان. الايدا كوروناۆيرۋس پاندەمياسىنا بايلانىستى الەم اتلەتتەرى بۇل سىندا ب ا ق سىناي العان جوق. بەسىنشى جارىستى ۇيىمداستىرۋدى بيىل ساۋد ارابياسىنىڭ كورولدىگى ءوز موينىنا الدى. وسى ۋاقىتقا دەيىن دۇنيەجۇزىلىك جاۋىنگەرلىك ونەر ويىندارىندا 77 مەملەكەتتىڭ سپورتشىسى جۇلدە العان. قازاقستان جالپى ەسەپتە 1 التىن، 3 كۇمىس جانە 5 قولا مەدالمەن 37-ورىندى گونكونگ جانە سەربيامەن ءبولىسىپ تۇر.
