گەرمانيادا اتاقتى فرانكفۋرت كىتاپ جارمەڭكەسى باستالدى.
كىتاپسۇيەر قاۋىمعا ارنالعان ەڭ كونە كورمەگە بيىل 75 جىل تولىپ وتىر. ۇيىمداستىرۋشىلاردىڭ ايتۋىنشا، ءىس-شاراعا 100 مىڭنان استام مەيمان قاتىسادى. جارمەڭكەگە قازاق باسپاگەرلەرى دە بارعان، دەپ حابارلايدى Almaty-akshamy.kz 24.kz-كە سىلتەمە جاساپ.
بيىل 100-گە جۋىق مەملەكەتتەن 4 مىڭ باسپا ءونىمى ۇسىنىلىپ وتىر. اراسىندا جالپى ادەبيەت، بالالار شىعارمالارى، ەلەكترون كىتاپتار، كاراتالار مەن كونە قولجازبالار بار. ال قازاقستاننان 5 باسپا بارعان. ماسەلەن، «الماتىكىتاپ» ىبىراي، شوقان، اباي سىندى قازاق عۇلامالارىنىڭ مۇراسى مەن ءومىرى تۋرالى توم-توم كىتاپتاردى تانىستىرىپ جاتىر. ولار ۇلتتىق ناقىشتا بەينەلەنگەن كىتاپتارعا سۇرانىس جوعارى دەيدى.
«ءبىز ەرەكشە دايىندىقپەن كەلدىك. وسى جولى ۇلتتىق مەرەكەمىز - ناۋرىز تۋرالى بالالارعا ارنالعان جيناق الىپ كەلدىك. ءتىلى - جەڭىل ءارى قىزىقتى. باسقا ەلدەردىڭ بالالارىنا ناۋرىز مەيرامىنىڭ ماڭىزىن تۇسىندىرەدى. قوسىمشا QR كود ارقىلى قازاقتىڭ اسەم اندەرىن تىڭداۋعا بولادى»، - دەيدى «الماتىكىتاپ» باسپاسىنىڭ پرەزيدەنتى گاۋحار سايماسايەۆا.
«مىنا ەرەكشە كىتاپتارعا بىردەن كوزىم ءتۇستى. مىسالى، قازاقتىڭ ۇلتتىق ەرەكشەلىكتەرى تۋرالى كىتاپ كيىز ءۇي تۇرىندە ازىرلەنىپتى. ءماتىنى دە ايرىقشا، وقىعان ادامدى بىردەن باۋراپ الادى ەكەن»، - دەيدى بەرلين ۋنيۆەرسيتەتىنىڭ پروفەسسورى بوستيان دۆوراك.
فرانكفۋرت جارمەڭكەسى – وقىرمانداردى عانا ەمەس، سونداي-اق قالامگەر، باسپاگەر، اۋدارماشىنى ءبىر ارناعا توعىستىرعان ۇلكەن شىعارماشىلىق الاڭى. قازاقستان وكىلدەرى بىرنەشە كەلىسسوز جۇرگىزىپ ۇلگەرگەن. سونىڭ ىشىندە، ۇلىبريتانيانىڭ ەڭ اۋقىمدى باسپا ۇيىمەن جاڭا كەزدەسۋ وتكىزدى.
«ءبىز قازاقستاندىق سەرىكتەستەرمەن جىل سايىن كەزدەسەمىز. ونداعى 4 باسپا ءۇيى جانە باسقا كومپانيالارمەن تۇراقتى بايلانىستامىز. «الماتىكىتاپ» باسپاسىمەن جۇمىس ىستەپ جۇرگەنىمىزگە 15 جىلعا جۋىقتادى. وسى جولى ولارعا بالالار ادەبيەتىنەن ءتۇرلى وقۋلىقتار، ەنسيكلوپەديا، كىتاپتارىمىزدى ۇسىندىق. كوڭىلدەن شىققاندارىن قازاق تىلىنە اۋدارامىز دەپ وتىر»، - دەيدى باسپا ءۇيىنىڭ وكىلى برانيسلاۆ حروجەنچيك.
بۇل جەردە قالامگەرلەردىڭ كىتابىن تانىستىرۋعا دا زور مۇمكىندىك بار. جارمەڭكە 5 كۇنگە سوزىلادى.