پرەزيدەنت ءتيىستى جارلىققا قول قويدى.
قازاقستان پرەزيدەنتى ۇكىمەتتە ءبىرقاتار تاعايىنداۋلار جاسادى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
مەملەكەت باسشىسىنىڭ جارلىعىمەن ولجاس اباي ۇلى بەكتەنوۆ قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەتتىڭ) ءتوراعاسى لاۋازىمىنا تاعايىندالدى.
ال جانات ەليمانوۆ قارجىلىق مونيتورينگ اگەنتتىگى باسشىسى قىزمەتىندە قالدى.
"جانات قالدىبەك ۇلى ەليمانوۆ قازاقستان رەسپۋبليكاسى قارجىلىق مونيتورينگ اگەنتتىگىنىڭ ءتوراعاسى لاۋازىمىنا تاعايىندالدى. ءتيىستى جارلىق اقوردانىڭ سايتىندا جاريالانعان"، - دەلىنگەن اقوردانىڭ رەسمي سايتىندا.
مەملەكەت باسشىسىنىڭ جارلىعىمەن ساكەن سايىن ۇلى يسابەكوۆ قازاقستان رەسپۋبليكاسى مەملەكەتتىك كۇزەت قىزمەتىنىڭ باستىعى لاۋازىمىنا تاعايىندالدى.
سونىمەن قاتار پرەزيدەنتتىڭ جارلىعىمەن پرەزيدەنتتىڭ ءىس باسقارۋشىسى لاۋازىمىنا ايبەك ارقاباي ۇلى دادەبايەۆ تاعايىندالدى. ءتيىستى جارلىق اقوردانىڭ سايتىندا جاريالاندى.
پرەزيدەنت دارحان مەدەعالي ۇلى جازىقبايەۆتى قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ ءتوراعاسى لاۋازىمىنا تاعايىندادى.
اسەت ارمان ۇلى ەرعالييەۆ قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى لاۋازىمىنا تاعايىندالدى.
"اسەت ارمان ۇلى ەرعالييەۆ قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگىنىڭ ءتوراعاسى لاۋازىمىنا تاعايىندالسىن.قازاقستان رەسپۋبليكاسىنىڭ پرەزيدەنتى ق.توقايەۆ
استانا، اقوردا، 2022 جىلعى 28 قاراشا، № 18"، - دەپ جازىلعان جارلىقتا.
ال، باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى ءوز ورنىندا قالدى.
مارات تالعات ۇلى وماروۆ قازاقستان رەسپۋبليكاسى باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى لاۋازىمىنا تاعايىندالدى. ءتيىستى جارلىققا بۇگىن پرەزيدەنت قول قويدى، دەپ حابارلايدى Almaty-akshamy.kz.
