قازاقستاندا ەكوتۋريزم بەلسەندى دامىپ كەلەدى.
مىسالى، وتكەن جىلى ەلىمىزدىڭ ۇلتتىق ساياباقتارىنا 1،7 ملن ادام كەلگەن، دەپ حابارلادى Almaty-akshamy.kz
بۇل تۋرالى «تابيعاتقا قۇلاق سال» جاڭا ەكولوگيالىق مارشرۋتىنىڭ اشىلۋى كەزىندە ەكولوگيا، گەولوگيا جانە تابيعي رەسۋرستار ۆيسە-مينيسترى ءاليا شالابەكوۆا مالىمدەدى.
«ۇلتتىق ستاتيستيكانىڭ دەرەگىنە سايكەس، وتكەن جىلى ۇلتتىق ساياباقتارعا كەلۋشىلەر سانى 1،5 ملن ادامدى قۇرادى. بۇل كورسەتكىشتى 2020 جىلعى كورسەتكىشپەن سالىستىرار بولساق، 2021 جىلى 40%-عا وسكەنىن كورەمىز. بيىلعى 10 ايداعى دەرەكتەردى قاراساق، وندا ادام سانى 1،7 ملن-نان اسقان. بۇل - قازاقستاننىڭ بارلىق 14 ۇلتتىق پاركى بويىنشا دەرەكتەر»، - دەدى ول.
ۆيسە-مينيستر زاڭنامالىق دەڭگەيدە ماجىلىستە ۇلتتىق پارك اۋماعىندا ەكولوگيا زاڭىن بۇزعاندارعا جازانى قاتاڭداتۋ تۋرالى زاڭ جوباسى قارالىپ جاتقانىن اتاپ ءوتتى.
«ءبىز پرەزيدەنتتىڭ تاپسىرماسى بويىنشا ساياباقتاردى لاستاۋ، رەجيمدى بۇزعانى ءۇشىن جازانى ارتتىرۋ تۋرالى ۇسىنىس ەنگىزدىك، ايىپپۇلداردى ەكى ەسەگە ارتتىردىق. مىسالى، بۇعان دەيىن جەكە تۇلعالارعا بۇزۋشىلىقتار ءۇشىن 10 اەك مولشەرىندە ايىپپۇل سالىنسا، ءقازىر 20 اەك-كە دەيىن ۇلعايتىلدى. ازىرگە بۇل زاڭ پارلامەنتتە قارالىپ جاتىر»، - دەدى ءاليا شالابەكوۆا.
ونىڭ ايتۋىنشا، بۇگىنگى كۇنى ۇلتتىق ساياباقتارعا كەلۋشىلەرگە ىڭعايلى بولۋ ءۇشىن ونلاين تولەم قولدانىلادى.
ۇلتتىق ساياباقتىڭ اۋماعىنا كىرگەندە، كەلۋشىلەر ەكىنشى دەڭگەيلى بانكتەردىڭ قوسىمشاسى ارقىلى تولەي الادى.
ءاليا شالابەكوۆا قوعامدىق دارەتحانالار ماسەلەسىنە دە توقتالدى.
ايتۋىنشا، ۇلتتىق ساياباقتار قوعامدىق دارەتحانالاردى كۇتىپ ۇستاۋ، قىزمەت كورسەتۋ بويىنشا جوسپار قۇرعان.
بۇگىنگى تاڭدا ەكولوگيا، گەولوگيا جانە تابيعي رەسۋرستار مينيسترلىگى مەن مادەنيەت جانە سپورت مينيسترلىگى بىرلەسىپ، سانيتارلىق توراپتاردى كۇتىپ ۇستاۋعا جۇمسالاتىن شىعىندى 83 مىڭ تەڭگە كولەمىندە سۋبسيديالاۋ ماسەلەسىن پىسىقتاپ جاتىر.
سپيكەر بۇگىنگى كۇنى كوپتەگەن ۇلتتىق پاركتەردە تۋريستىك مارشرۋتتار اشىلىپ جاتقانىن ايتتى.
«ءبىز «كولساي كولدەرى» ۇلتتىق تابيعي پاركىندە «تابيعاتقا قۇلاق سال» ەكولوگيالىق مارشرۋتىن اشتىق. ەكى اپتا بۇرىن كاتون-قاراعايدا ەكومارشرۋت اشىلدى، سونداي-اق، سايرام-وگەم ۇلتتىق پاركىندە ەكوجولدى اباتتاندىرۋ جۇمىسى اياقتالىپ قالدى. التىنەمەل مەن شارىنعا باراتىن مارشرۋتتار سالىندى. ولار كەلۋشىلەر ءۇشىن وتە ىڭعايلى. بۇل جۇمىستىڭ ءبارى باسقا ساياباقتاردا دا جالعاسادى. كەلەسى جىلى شاعىن ۇلتتىق ساياباقتار - قارقارالى، بۇيراتاۋ، كوكشەتاۋدى اباتتاندىرامىز»، - دەدى ءاليا شالابەكوۆا.