دۋبايعا جۇمىس ىستەۋگە كەتكەن قازاقستاندىق ازامات تابىلماي جاتىر

جوعالعان جىگىت 27 جەلتوقساننان بەرى بايلانىسقا شىقپاعان.

دۋبايعا جۇمىس ىستەۋگە كەتكەن قازاقستاندىق ازامات جوعالىپ كەتتى، دەپ حابارلايدى Almaty-akshamy.kz Elorda.info سايتىنا سىلتەمە جاساپ. 

LIFE09 اقپارات اگەنتتىگىنىڭ جازۋىنشا، قازبەكوۆ يسلامبەك 2022 جىلدىڭ قىركۇيەك ايىندا دۋباي قالاسىنا جۇمىس ىستەۋگە كەتكەن. ءبىراق جىل سوڭىنا قاراي يسلامبەك دوستارىنا بەلگىسىز ادامداردىڭ ايتۋىمەن تايلاندقا اۋىسقانىن ايتقان. كەيىننەن تايلاند، لاوس، ميانما ەلدەرىمەن شەكتەسەتىن «زولوتوي ترەۋگولنيك» دەگەن جەرگە الدانىپ كەلگەنىن ايتقان. ءبىراق  27 جەلتوقساننان بەرى بايلانىسقا شىقپاعان. 

جوعالعان ازامات سوڭعى حابارلاماسىندا تۇسىنىكسىز جايتتاردىڭ بولىپ جاتقانىن دوستارىنا ەسكەرتىپتى.

«زولوتوي ترەۋگولنيك» دەگەن جەرگە كەلگەنشە 10 پوستتان وتتىك. قايدا تاپ بولعانىمدى سوندا كەلگەندە عانا ءتۇسىندىم. جانىمدا 1 قازاقستاندىق جىگىت، 2 پاكىستاندىق جانە تاعى ءبىر ادام بار. بىزگە باسىندا اۋدارماشى بولاسىڭدار دەگەن، كەيىننەن ساتۋ جۇمىستارىمەن اينالىساسىڭدار دەدى. ساتۋدان قاجەتتى اقشانى تاپپاساڭدار، اقشانى وزدەرىڭ تولەيسىڭدەر دەپ ايتتى. ال ول اقشانى وتەپ بەرە الماساق، ۇرامىز، قۇلدىققا سالامىز، تۇرمەگە قامايمىز دەيدى. ەندى ءبىر امال بولسا، قايتىپ كەتۋگە تىرىسامىز. ەگەر مەنەن حابار ءۇزىلىپ قالسا، جاعدايدىڭ قيىنداعانى دەپ تۇسىنىڭدەر»، – دەلىنگەن جوعالعان جىگىتتىڭ سوڭعى حابارلاماسىندا. 

دوستارىنىڭ ايتۋىنشا، يسلامبەكتى  قۇلدىقتا ۇستاپ وتىرۋى مۇمكىن.  

مەملەكەتتىك ورگاندار جوعالعان ازامات تۋرالى قانداي دا ءبىر اقپارات ءبىلۋ ءۇشىن جۇمىس ىستەپ جاتىر. ول جەردە زاڭنىڭ كۇشى اسا جۇرە بەرمەيدى. بۇرىنعى تاجىريبەلەر كورسەتكەندەي، ول ەلدەردە وسىنداي جاعدايعا تاپ بولعان ادامداردى قايتارۋ ءۇشىن قوماقتى قارجى سۇرايدى.