جارتى جىلعا جۋىق ۋاقىت ىشىندە ەلىمىزدىڭ پاۆيلونىن 1 ملن 200 مىڭنان استام ادام تاماشالاعان.
كۇن سايىن ۇلى دالا ەلىمەن تانىسۋعا نيەتتىلەر ۇزىن-سونار كەزەككە تۇرادى. وتانداستارىمىزبەن قاتار، شەتەلدىك قوناقتار دا كوپ. ولاردىڭ سانى تاۋلىگىنە 8 مىڭ ادامعا دەيىن جەتەدى، دەپ حابارلايدى Almaty-akshamy.kz
ۇلتتىق پاۆيلوننىڭ مازمۇنى كورمەنىڭ «اقىل-ويدى بىرىكتىرىپ، بولاشاقتى قۇرۋ» تاقىرىبىن تولىق اشادى. گيدتەر كەلۋشىلەردى ەلىمىزدىڭ تابيعاتى، تاريحى، مادەنيەتى، ءداستۇرى، سونداي-اق ەل دامۋىنداعى پەرسپەكتيۆالىق جوبالارىمەن تانىستىرىپ، جۇمباق جانە تاڭعاجايىپ قازاقستانعا ينتەراكتيۆتى ساياحاتقا جەتەلەيدى.
«پاۆيلوندى كورگەنىمە قۋانىشتىمىن. قازاقستاننىڭ تابيعي رەسۋرستارعا، ءتۇرلى پايدالى قازباعا باي ەكەنىن دە بىلمەپپىن. بۇل – مەن ءۇشىن ۇلكەن جاڭالىق. سونىمەن قاتار قازاقستاندا اۋىل شارۋاشىلىعى سالاسىنىڭ جاقسى دامىعانى دا تاڭعالدىردى. بۇل وتە اسەرلى. اگوونەركاسىپ كەشەنى زامان اعىمىنا ساي دامىپ كەلەدى ەكەن. قولونەر ۇلگىلەرى، كىرەبەرىستەگى شامداردىڭ جارقىراۋى - بارلىعى جاقسى ويلاستىرىلعان. كىرگەندە جۋسان ءيىسىن سەزىنىپ، ۇلى دالا ەلىندە جۇرگەندەي بولدىم»، - دەيدى كورمە قوناعى /پالەستينا/ ۆاليد شاتايەۆ.
كەلۋشىلەر اراسىندا ادامنىڭ جاساندى ينتەللەكتپەن بايلانىسىن كورسەتەتىن قورىتىندى اكروباتيكالىق شوۋ ەرەكشە نازارعا يە.
ايتا كەتەيىك، دۋبايداعى EXPO-2020 حالىقارالىق كورمەسى ناۋرىز ايىنىڭ سوڭىنا دەيىن جالعاسادى. وعان بارلىعى 192 مەملەكەت قاتىسۋدا.