جەڭىس كۇنىنە ارنالعان دروندار شوۋىن تاماشالاۋعا اباي الاڭىنا 60 مىڭنان استام ادام جينالدى.
9 مامىر كۇنى الماتىدا جەڭىستىڭ 80 جىلدىعىنا ارنالعان اۋقىمدى دروندار شوۋى بولىپ ءوتتى. بۇل اسەرلى كورىنىس مەرەكەنىڭ شارىقتاۋ شەگى. وسى ساتتە 500-دەن استام درون كوككە كوتەرىلىپ، جارىق پەن انيماسيا ارقىلى ەرلىك پەن جانقيارلىقتى، ەستە قالعان ەرلىككە تولى ساتتەردى باياندادى. شوۋ وتكەن اباي الاڭىنا 60 مىڭنان استام قالا تۇرعىنى جينالدى. سونداي-اق، «الماتى» تەلەارناسىنىڭ YouTube-ارناسىندا تىكەلەي ەفير ۇيىمداستىرىلدى، دەپ حابارلايدى aqshamnews.kz
شوۋدىڭ اشىلۋ ساتىندە «80 • 1941–1945» دەگەن جازۋى بار جۇلدىز پايدا بولدى – بۇل ەرلىكتىڭ سيمۆولى ءارى ۇلى جەڭىس جىلدارىن ەسكە سالاتىن بەلگى. ودان كەيىن اسپاندا جاۋىنگەر كاسكاسى مەن قىزىل قالامپىرلار بەينەلەنىپ، سوعىستا قازا تاپقاندارعا قۇرمەت كورسەتىلدى. ەڭ اسەرلى كورىنىستىڭ ءبىرى – سوعىستان ورالماعان ساربازداردىڭ رۋحىن بەينەلەيتىن ۇشىپ بارا جاتقان تىرنالار كومپوزيسياسى بولدى.
شوۋدىڭ ماڭىزدى بولىگى قازاقستاندىق قاھارماندارعا ارنالدى. اتى اڭىزعا اينالعان مانشۇك مامەتوۆا مەن ءاليا مولداعۇلوۆانىڭ كەزەگى كەلگەندە، مانشۇك – پۋلەمەتپەن، ءاليا – مىلتىقپەن شىقتى. سونداي-اق، جاۋىنگەرلىك ۇشاقپەن تۇرعان ايگىلى ۇشقىش تالعات بيگەلدينوۆتىڭ بەينەسى دە بولدى اراسىندا. حالىق قاھارمانى، قولباسشى ءارى جازۋشى باۋىرجان مومىش ۇلىنىڭ تۇلعاسى باتىرلىق پەن قايسارلىقتىڭ سيمۆولى رەتىندە جارىققا شىقتى.
بۇدان وزگە كورىنىستەردە جەڭىس تۋىنىڭ كوتەرىلۋ ءساتى، جۇلدىز پىشىنىندەگى ماڭگىلىك الاۋ مەن «ەشكىم دە، ەشقاشان دا ۇمىتىلمايدى!» دەگەن جازۋ بەينەلەندى. شوۋدىڭ اقتىق ساتىندە قازاقى ويۋمەن كومكەرىلگەن كومپوزيسيا مەن جارقىراعان «جەڭىس كۇنى قۇتتى بولسىن!» دەگەن جازۋ كورەرمەندەردى ەرەكشە اسەرگە بولەدى.
بۇل جارىق شوۋ – ەسكە الۋ شاراسى عانا ەمەس، تاريحي مۇرانى جاڭا بۋىنعا جەتكىزۋدىڭ جاڭا ءتاسىلى. ول تاريحتى ۇمىتپاي، وعان ماقتانىشپەن قاراۋ كەرەكتىگىن ەسكە سالدى.
كورەرمەندەرگە اباي الاڭىندا، «قازاقستان» ءقوناقۇيى جانىندا، Caspian University ماڭىندا جانە اباي داڭعىلى بويىندا ارناۋلى الاڭدار دايارلاندى. شوۋ كەزىندە قالا ورتالىعىنداعى كولىك قوزعالىسى ۋاقىتشا شەكتەلدى.
الماتىداعى دروندار شوۋى جەڭىس كۇنىن اتاپ ءوتۋدىڭ جارقىن ءارى ەستە قالارلىق ساتىنە اينالدى. شوۋدىڭ اسەرىن كۇشەيتكەن اسكەري جىلدارداعى اندەر مەن پاتريوتتىق اۋەندەر ءار كورىنىستىڭ ەموسيالىق قۋاتىن ارتتىرىپ، كورەرمەندەردىڭ كوكەيىنە ماقتانىش سەزىمىن ۇيالاتتى.