قازاقستاننىڭ حالىق جازۋشىسى، تانىمال اقىن تەمىرحان مەدەتبەك 81 جاسىنا قاراعان شاعىندا دۇنيەدەن ءوتتى. بۇل تۋرالى Aqshamnews.kz سايتى حابارلايدى.
تەمىرحان مەدەتبەك 1945 جىلى ناۋرىزدا تۇركىستان وبلىسى، تۇركىستان اۋدانى، امانكەلدى اتىنداعى كولحوزدا دۇنيەگە كەلگەن. بالا كەزىنەن پوەزياعا قۇشتار بولىپ وسكەن ول قازاق مەملەكەتتىك ۋنيۆەرسيتەتىن ءتامامداپ، شىعارماشىلىق جولىن ەرتە باستاعان.
اقىن ۇزاق جىلدار بويى ادەبيەت پەن جۋرناليستيكا سالاسىندا جەمىستى ەڭبەك ەتىپ، قازاق پوەزياسىنىڭ دامۋىنا زور ۇلەس قوستى. ونىڭ ولەڭدەرى تەرەڭ ويىمەن، ۇلتتىق رۋحتى پاش ەتۋىمەن ەرەكشەلەنەدى.
تەمىرحان مەدەتبەكتىڭ شىعارماشىلىعى قازاق پوەزياسىنىڭ التىن قورىنا ەنگەن كوپتەگەن تۋىندىلاردى قامتيدى. ونىڭ «جانىمنىڭ جاپىراقتارى»، «ساپار الدىندا»، «الىس شاقىرىمدار»، «مارتەبە»، «اۋەدەگى تولقىندار»، «داۋىس»، «كوگەرشىن قاۋىرسىندارى»، «اڭقا كەپتىرگەن اڭىزاق»، «سىرىم بار ساعان ايتاتىن»، «تاعدىرلى جىلدار جىرلارى»، «كوك تۇرىكتەر سارىنى» اتتى جىر جيناقتارى وقىرماندار اراسىندا كەڭىنەن تانىمال.
سونىمەن قاتار، اقىننىڭ پۋبليسيستيكالىق ەڭبەكتەرى دە ۇلكەن قىزىعۋشىلىق تۋدىردى. «مەنىڭ ابايىم»، «بابا ءداستۇردىڭ مۇراگەرى كىم؟»، «سەگىز قىرلى سەكسەن سىرلى الەم بۇل» اتتى كىتاپتارى ادەبيەت سۇيەر قاۋىمنىڭ نازارىنا ىلىكتى.
تەمىرحان مەدەتبەك شەتەلدىك ادەبيەتتى قازاق وقىرماندارىنا تانىتۋدا دا ەلەۋلى ەڭبەك ءسىڭىردى. ول پۋشكين، لەرمونتوۆ، ياكوب كولاس، يانكا كۋپالا، لەسيا ۋكراينكا، رادوۆان زاگوۆيچ، بودلەر، ۆەرحارن، پابلو نەرۋدا، نەزۆال، ەركىن ۆاحيدوۆ سياقتى تانىمال اقىنداردىڭ ولەڭدەرىن قازاق تىلىنە اۋداردى.
سونىمەن قاتار، گەنريح بەللدىڭ «يەسىز ءۇي» رومانى مەن ۆلاديمير نابوكوۆتىڭ ءبىرقاتار شىعارمالارىن قازاق تىلىنە اۋدارىپ، الەمدىك ادەبي مۇرانى ناسيحاتتاۋعا ۇلەس قوستى. اقىننىڭ ءوز ولەڭدەرى دە بىرنەشە تىلگە (قىرعىز، وزبەك، ۋكراين، ورىس، جۇڭگو، تاتار) اۋدارىلىپ، شەتەل وقىرماندارىنا ۇسىنىلعان.
تەمىرحان مەدەتبەكتىڭ ومىردەن ءوتۋى قازاق ادەبيەتى ءۇشىن ۇلكەن قايعى. ونىڭ شىعارماشىلىعى قازاق پوەزياسىنىڭ دامۋىندا ەرەكشە ءىز قالدىردى.
تەمىرحان مەدەتبەك – ۇلتتىق رۋح پەن تاريحتى جىرلاعان دارىن يەسى. ونىڭ شىعارماشىلىق مۇراسى بولاشاق ۇرپاق ءۇشىن باعا جەتپەس قازىنا بولىپ قالا بەرەدى.