اكتەر تەاتر ساحناسىندا جانە كينودا 200-دەن استام ءرولدى سومداعان.
تانىمال اكتەر جانە رەجيسسەر، قازاقستاننىڭ حالىق ءارتىسى دوسحان جولجاقسىنوۆ پرەزيدەنت جارلىعىمەن «وتان» وردەنىمەن ماراپاتتالدى، دەپ حابارلايدى Almaty-akshamy.kz
«قاۋلى ەتەمiن: 1. ۇلتتىق مادەنيەتتى، كينەماتوگرافيانى جانە تەاتر ونەرىن دامىتۋعا قوسقان ايرىقشا ەڭبەگى ءۇشىن دوسحان قالي ۇلى جولجاقسىنوۆ «وتان» وردەنىمەن ناگرادتالسىن. 2. وسى جارلىق قول قويىلعان كۇنىنەن باستاپ قولدانىسقا ەنگىزىلەدى»، -دەلىنگەن ق ر پرەزيدەنت جارلىعىندا.
دوسحان جولجاقسىنوۆ بۇگىن 70 جاسقا تولدى. تانىمال اكتەر جانە رەجيسسەر، سونىمەن قاتار حالىق اندەرى مەن قازىرگى قازاق كومپوزيتورلارى اندەرىن شەبەر ورىنداۋشى رەتىندە كەڭىنەن تانىمال.
جولجاقسىنوۆ ۇلتتىق كينو ونەرىنىڭ دامۋىنا ءوز ۇلەسىن قوسىپ، «گاۋھارتاس»، «دالاداعى قۋعىن»، «التىن كۇز»، «ومپا»، «اق بارىستىڭ ۇرپاقتارى»، «كوشپەندىلەر»، «ءبىرجان سال» جانە باسقا دا فيلمدەرگە تۇسكەن.
دوسقان قالي ۇلى جولجاقسىنوۆ 1951 جىلى 7 قازاندا شىعىس قازاقستان وبلىسى، كۇرشىم اۋدانى، بالىقشى اۋىلىندا تۋعان.