“دوس-مۇقاسان” سوليسىنە "حالىق ءارتىسى" اتاعى نەگە بەرىلمەدى؟ مينيسترلىك سەبەبىن ءتۇسىندىردى

الەۋمەتتىك جەلى قولدانۋشىلارى "دوس-مۇقاسان" ءانسامبلىنىڭ ءسوليسى مۇرات قۇسايىنوۆ نەگە ءالى كۇنگە دەيىن "قازاقستاننىڭ حالىق ءارتىسى" اتاعىن الماعانىن ايتىپ، تالقىلاپ جاتىر، - دەپ حابارلايدى aqshamnews.kz ءتىلشىسى Tengri Life-قا سىلتەمە جاساپ. 

داۋ نەدەن باستالدى؟

Threads جەلىسىندەگى "نەگە مۇرات قۇسايىنوۆتا "حالىق ءارتىسى" اتاعى جوق، ال كەيبىر جاس انشىلەردە بار؟" دەگەن جازبا تارادى. ول ميلليوننان اسا قارالىم جيناپ، ونداعان پىكىر تۋدىردى.

پىكىرلەردە قولدانۋشىلار بۇل ادىلەتسىز ەكەنىن ايتىپ جازعان. 

مينيسترلىك نە دەيدى؟

ۆەدومستۆو مۇرات قۇسايىنوۆتا راسىمەن دە "قازاقستاننىڭ حالىق ءارتىسى" اتاعى جوعىن راستادى. سونداي-اق، مينيسترلىك بۇل اتاقتى بەرۋ تۋرالى ەشقانداي رەسمي ءوتىنىش تۇسپەگەنىن ايتتى. 

"مۇرات قۇسايىنوۆقا "حالىق ءارتىسى" اتاعىن بەرۋ تۋرالى ءوتىنىش تۇسكەن جوق. ءقازىر مەملەكەتتىك ماراپاتتارعا قۇجات قابىلداۋ مەرزىمى اياقتالدى. كەلەسى جىلى ءتيىستى تۇردە راسىمدەلگەن قۇجاتتار مەن ءوتىنىش تۇسسە، مينيسترلىك ولاردى بەلگىلەنگەن تارتىپپەن قاراۋعا دايىن"، – دەپ ءتۇسىندىردى ۆەدومستۆو وكىلدەرى.

سونىمەن قاتار، مينيسترلىك قۇسايىنوۆتىڭ بۇعان دەيىن دە ءبىرقاتار جوعارى ماراپاتقا يە بولعانىن ەسكە سالدى:

• "قازاقستاننىڭ ەڭبەك سىڭىرگەن ءارتىسى"؛

• "قازاقستاننىڭ ەڭبەك سىڭىرگەن قايراتكەرى"؛

• "قۇرمەت" وردەنى؛

• "پاراسات" وردەنى.

"حالىق ءارتىسى" اتاعى كىمدەرگە بەرىلەدى؟

مينيسترلىكتىڭ تۇسىندىرۋىنشە، 2023 جىلدان باستاپ "قازاقستاننىڭ حالىق ءارتىسى" اتاعى تەاتر، سيرك، مۋزىكا نەمەسە كينو سالاسىنىڭ دامۋىنا ەلەۋلى ۇلەس قوسقان مادەنيەت قايراتكەرلەرىنە بەرىلەدى.

ماڭىزدى شارتتاردىڭ ءبىرى – ۇمىتكەردە بۇعان دەيىن "قازاقستاننىڭ ەڭبەك سىڭىرگەن ءارتىسى" نەمەسە "قازاقستاننىڭ ەڭبەك سىڭىرگەن قايراتكەرى" سەكىلدى قۇرمەتتى اتاقتاردىڭ ءبىرى بولۋى كەرەك.

ۆەدومستۆو ماراپات بەرۋ ءتارتىبى "مەملەكەتتىك ناگرادالار تۋرالى" زاڭدا جانە پرەزيدەنتتىڭ 1999 جىلعى 8 قاراشاداعى № 90 جارلىعىمەن بەكىتىلگەن نۇسقاۋلىقتا جازىلعانىن اتاپ ءوتتى. 

"پرەزيدەنت مەملەكەتتىك ناگرادالارمەن ماراپاتتايدى. ناگراداعا ۇسىنۋ تۋرالى ۇسىنىستاردى پرەزيدەنتكە پارلامەنت، ۇكىمەت، مينيسترلىكتەر، اگەنتتىكتەر، وزگە دە ورتالىق جانە جەرگىلىكتى اتقارۋشى ورگاندار، شىعارماشىلىق وداقتار، ەڭبەك ۇجىمدارى جانە باسقا دا ۇيىمدار ەنگىزەدى"، – دەدى مينيسترلىك.