دومبىرانىڭ قوڭىر ءۇنى ءبىر ساتتە كۇمبىرلەيدى

17 ناۋرىز كۇنى بارلىق ءبىلىم ۇيىمىندا ەلوردا ۋاقىتىمەن ساعات 12:00-دە «ناۋرىز مەيرامى» ۇلتتىق چەللەندجى وتەدى.

بۇل تۋرالى وقۋ-اعارتۋ مينيسترلىگىنىڭ تاربيە جۇمىسى جانە قوسىمشا ءبىلىم بەرۋ دەپارتامەنتى ديرەكتورى امان سەيتوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

دەپارتامەنت باسشىسىنىڭ ايتۋىنشا، شارا ءبىلىم الۋشىلاردى ۇلتتىق رۋح پەن وتانسۇيگىشتىككە تاربيەلەۋگە، ەلدىڭ مادەني مۇراسىن ساقتاپ، بالالار اراسىندا ۇلتتىق مۋزىكالىق اسپاپتى ناسيحاتتاۋعا باعىتتالعان.

«دومبىراشىلار چەللەندجى - بالالار مەن جاستاردىڭ، مۇعالىمدەر مەن اتا-انالاردىڭ مۋزىكالىق ونەر سالاسىنداعى شىعارماشىلىق جەتىستىكتەرىن كورسەتۋ جانە دومبىرانى دارىپتەۋ. وعان بارلىق نيەت بىلدىرۋشىلەر قاتىسا الادى. مۇنداي چەللەندج وقۋشىلار اراسىندا العاش رەت وتكىزىلىپ وتىر. وسى جۇما كۇنى ەلىمىزدىڭ بارلىق ءبىلىم بەرۋ ۇيىمدارىندا ءبىر ۋاقىتتا دومبىرانىڭ قوڭىر ءۇنى كۇمبىرلەيتىن بولادى. بۇل رەسپۋبليكانىڭ مادەني ومىرىندەگى ەرەكشە وقيعا»،— دەيدى امان سەيتوۆ.

ايتا كەتەيىك، بيىل ەلىمىزدىڭ بارلىق جالپى ءبىلىم بەرەتىن مەكتەپتەرىندە ناۋرىز مەيرامى 10-17 ناۋرىز ارالىعىندا وتەدى.

بۇل كۇندەرى جالپى رەسپۋبليكالىق «تازا تابيعات» اكسياسى، «جاسىل ءۇي» چەللەندجى، «قايىرىمدى ۇلت»، «قولونەرشىلەر جارمەڭكەسى» قايىرىمدىلىق اكسيالارى، ۇلتتىق ويىندار، ۇلتتىق تاعامدار فەستيۆالى، «ناۋرىز – ۇلىستىڭ ۇلى كۇنى» اتتى سۋرەت بايقاۋى جانە «وتباسى – باقىت مەكەنى»وتباسىلىق جارىس باستالادى.

سونداي-اق الەۋمەتتىك جەلىلەردە #ناۋرىزمەيرامى #ناۋرىزكۇيى حەشتەگىمەن فلەشموبتار مەن چەللەندجدەر جوسپارلانعان.