تالقىلاۋ بارىسىندا حالىقارالىق جانە الەمدىك تاجىريبەلەر نەگىزگە الىنادى.
بۇل تۋرالى Antikor.Live جوباسىندا ءبىلىم جانە عىلىم ءمينيسترى ايتتى، دەپ حابارلايدى Almaty-akshamy.kz مينيسترلىكتىڭ باسپا ءسوز قىزمەتىنە سىلتەمە جاساپ.
مەكتەپ ديرەكتورلارىن روتاسيالاۋ ءبىر اكىمشىلىك-اۋماقتىق بىرلىك شەگىندە جۇزەگە اسىرىلاتىن بولادى. ۆەدومستۆو باسشىسى روتاسيا ينستيتۋتىن ەنگىزۋ – ديرەكتورلاردى تاعايىنداۋدىڭ جاڭا جۇيەسى، ولاردى اتتەستاتتاۋ، جالاقى مەن ەڭبەك جاعدايىن ارتتىرۋمەن قاتار باسقارۋ ساپاسىن جاقسارتۋدىڭ ءتيىمدى تەتىكتەرىنىڭ ءبىرى ەكەنىن اتاپ ءوتتى.
«جالپى، الەمدىك تاجىريبە كورسەتىپ وتىرعانداي، كادرلاردى جاڭارتۋ، روتاسيالاۋ وتە ماڭىزدى. ءقازىر كوپشىلىك ءوز پىكىرلەرىن ءبىلدىرىپ جاتىر. ولاردىڭ اراسىندا «ەرتەڭ بۇكىل ەل بويىنشا 7500 ديرەكتور ءبىر مەزەتتە جۇمىس ورنىن اۋىستىرادى» دەپ جاتقاندار دا بار. نەگىزىندە، ولاي ەمەس. ماسەلەن، پاۆلودار وبلىسىندا جۇمىس ىستەپ جۇرگەن ادام قاراعاندى وبلىسىنا نەمەسە قاراعاندى وبلىسىنان تۇركىستان وبلىسىنا جىبەرىلمەيتىنى تۇسىنىكتى. ءقازىر ءبىز تەك ءبىر اكىمشىلىك-اۋماقتىق بىرلىك شەگىندە عانا ايتىپ جاتىرمىز. روتاسيالاۋ بويىنشا ناقتى كريتەرييلەر انىقتالادى. ءبىز وزگەلەردىڭ بۇل تەتىكتى ءوز مۇددەلەرى ءۇشىن پايدالانىلۋىنا جول بەرمەۋىمىز كەرەك»، – دەپ اتاپ ءوتتى ءبىلىم جانە عىلىم ءمينيسترى.
مينيستر بۇگىنگى تاڭدا ۆەدومستۆو وكىلدەرى ساراپشىلارمەن بىرلەسە ديرەكتورلاردى روتاسيالاۋ ەرەجەلەرىن تالقىلاپ جاتقانىن ايتتى. كەيىن مەكتەپ ديرەكتورلارىن روتاسيالاۋ بويىنشا ناقتى كريتەرييلەر انىقتالادى.
«ءقازىر ارىپتەستەرىمىزبەن بىرگە ديرەكتورلاردى روتاسيالاۋ ەرەجەلەرىن تالقىلاپ جاتىرمىز. ءبىز حالىقارالىق جانە الەمدىك تاجىريبەنى زەرتتەدىك. تۇپكىلىكتى شەشىم بارلىعىنىڭ پىكىرىن ەسكەرە وتىرىپ قابىلدانادى. وسىنداي جاڭا ينستيتۋتتاردى ەنگىزۋ كەزىندە «زيان كەلتىرمە» قاعيداسىن ۇستانۋ ماڭىزدى. ياعني، بارلىق تاۋەكەلدى ەسكەرىپ، روتاسياعا ارنالعان نەگىزدەردى ناقتى رەگلامەنتتەۋ قاجەت»، – دەپ اتاپ ءوتتى اسحات ايماعامبەتوۆ.