«فوليانت» باسپاسى اتالعان كىتاپتى قازاق تىلىنە اۋدارۋعا اۆتورلىق قۇقىققا يە.
ەۋرازيالىق حالىقارالىق كىتاپ جارمەڭكەسىندە «ساقينالار ءامىرشىسى» تريلوگياسىنىڭ قازاق تىلىندەگى ءبىرىنشى ءبولىمى قالىڭ وقىرماننىڭ نازارىنا ۇسىنىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
العاش رەت ءتۇپنۇسقادان قازاق تىلىنە اۋدارىلعان تريلوگيانىڭ ەكىنشى جانە ءۇشىنشى بولىمدەرىن 2022 جىلدىڭ سوڭىنا دەيىن باسىپ شىعارۋ جوسپارلانعان. «ساقينالار ءامىرشىسى» رومان-ەپوپەياسىن اۆتور 1937 جىلى باستاپ، 1948 جىلى اياقتاعان. سودان بەرى كىتاپ 38 تىلگە اۋدارىلعان.
«فەنتەزيدىڭ اتاسى» اتانعان دجون تولكين تاڭعاجايىپ جەرورتا الەمىن قۇردى. ول تەك جازۋشى عانا ەمەس، ادەبيەت عىلىمىنىڭ دوكتورى، سۋرەتشى، پروفەسسور، فيلولوگ-لينگۆيست بولعان. مىنە، وسىنداي بىلىمدىلىگىنىڭ، امبەباپتىعىنىڭ ارقاسىندا ول ءوز شىعارمالارىندا جاساندى ەلفتەر، گنومدار جانە وركتەر، ت.ب. ارنايى ءتىل ويلاپ تاپقان.
سولاردىڭ ىشىندە ەڭ تانىمالى – ەلفتەر ءتىلى. ءتىپتى وكسفوردتا ەلفتار ءتىلىن وقىتاتىن ارنايى كۋرستار دا بار. ول-ول ما، تۋريزم سالاسىنداعى فەنومەن – تولكين-تۋريزم دە بار: «ساقينالار ءامىرشىسىنىڭ» جانكۇيەرلەرى شىعارما وقيعالارى وتەتىن جەرلەرگە ساياحاتتايدى. جازۋشى باتىرلىق ەپوپەيانى، ەرتەگى مەن شىتىرمان وقيعالى روماندى بىرىكتىرىپ، تاماشا كوركەم تۋىندى جاساپ شىققان. روماننىڭ استارلى سىرى مەن مازمۇنىنا تەرەڭ بويلاي وتىرىپ، اعىلشىن تىلىنەن اۋدارعان التىنجان يرالييەۆا.