الماتى حايۋاناتتار باعىنا امەريكاندىق ناتۋراليست-فوتوگراف كەلدى. ول سيرەك كەزدەسەتىن اڭداردى سۋرەتكە ءتۇسىرىپ، جويىلىپ كەتۋدىڭ الدىن الماق، دەپ حابارلايدى Almaty-akshamy.kz.
قىزىل كىتاپقا ەنگىزىلگەن اقبوكەندەر مەن ۇلارلاردى سۇرەتكە ءتۇسىرۋ ءۇشىن الماتى قالاسىنا 3 كۇن ايالدادىم. ويتكەنى، الماتى حايۋاناتتار باعىندا سيرەك كەزدەسەتىن اقبوكەندەردى كەزدەستىرۋگە بولادى. ولاردىڭ ءجۇرىس-تۇرىسى مەن كەلبەتى ماعان قاتتى ۇنادى. بولاشاقتا بۇل جانۋارلاردىڭ كوبەيىپ، قىزىل كىتاپقا ەنگىزىلمەگەنىن قالايمىن، – دەيدى دجوەل سارتورە.
دجوەل جانۋارلاردى قارا نەمەسە اق فوندا تۇسىرگەن. وسىلايشا، سۋرەتتە اقبوكەندەردىڭ بەينەسى ەرەكشەلەنە تۇسكەن.
جارىقتا پايدالانۋ – جانۋارلاردىڭ شىنايى تۇسستەرىن بەرەدى، ال – قارا جانە اق فون نازارىڭدى باسقا جاققا بۇرماي، جانۋارلاردىڭ تىكەلەي كوزىنە قاراۋعا مۇمكىندىك بەرەدى، – دەيدى فوتوگراف.
الماتى حايۋاناتتار باعى دجوەل سارتورەنى قۇرمەتپەن قارسى الىپ، جۇمىسىنا قاجەتتى قۇرالدارمەن قامتاماسىز ەتكەن.
ونىڭ سۋرەتتەرىندە كىشكەنتاي تىشقان دا، ۇلكەن ءپىل دە ادەمى كورىنەدى. فوتوگراف ءوز جۇمىسىن تياناقتى ءارى ۇقىپتى اتقارادى. ونىڭ تۇسىرگەن سۇرەتتەرىندە تۇمسا تابيعات پەن جان-جانۋارلار شەبەر ۇندەسەدى. فوتوگراف ءوز جۇمىسى ارقىلى ادامداردىڭ تابيعاتقا جاناشىرلىق تانىتۋىن ۇگىتتەيدى. دجوەل سارتورە ءبىزدىڭ حايۋاناتتار باعىن تاڭداعانىنا قۋانىشتىمىز، – دەيدى الماتى حايۋاناتتار باعىنىڭ قىزمەتكەرلەرى.
امەريكاندىق مامان سۋرەتكە تۇسىرگەن جانۋارلاردىڭ كەم دەگەندە 75-80 پايىزىن جويىلىپ كەتۋدەن قۇتقارۋعا بولادى دەيدى.
ادامداردىڭ جان-جانۋارلارعا دەگەن سۇيىسپەنشىلىگىن ارتتىرۋ كەرەك. سوندا عانا ءبىز جانۋارلاردى جويىلىپ كەتۋدەن ساقتاي الامىز. وسىلايشا ادامزات بالاسى قىزىل كىتاپقا ەنگەن تۇرلەرگە قالاي كومەك كورسەتۋدى ويلايدى. ولاردىڭ ومىرلەرىنە ءقاۋىپ توندىرەتىن ارەكەتتەرگە بارمايدى. ءبىز ۇيىمداستىرعان فوتوكورمەنىڭ ماقساتى – ۇلكەندى-كىشىلى بارلىق تىرشىلىك يەلەرىنە قۇرمەت كورسەتۋ. سونداي-اق ادامدارعا جانۋارلار جويىلىپ كەتسە، ءبىزدىڭ دە جوعالىپ كەتۋىمىز مۇمكىن ەكەنىن ءتۇسىندىرۋ، – دەيدى دجوەل سارتورە.