وقۋ-اعارتۋ مينيسترلىگى مەكتەپ فورماسىنا قاتىستى سۇراقتارعا جاۋاپ بەردى.
بيىل مىندەتتى مەكتەپ فورماسىنا قويىلاتىن تالاپتار وزگەرتىلگەن. اتاپ ايتقاندا، ءقازىر مەكتەپ وقۋشىلارى پولو جەيدە جانە فۋتبولكا، ۆودولازكا، تۇيمەلەرى نەمەسە ىلگەگى بار توقىلعان جەمپىر/كارديگان كيە الادى. سونداي-اق، گالستۋك ەندى مىندەتتى ەلەمەنت ەمەس، دەپ حابارلايدى Almaty-akshamy.kz.
مينيسترلىك ورتا ءبىلىم بەرۋ ۇيىمدارىنىڭ مىندەتتى مەكتەپ فورماسى ءبىلىم بەرۋدىڭ زايىرلى سيپاتىنا سايكەس كەلەتىنىن ەسكە سالدى. مەكتەپ فورماسى كۇندەلىكتى، سالتاناتتى جانە سپورتتىق بولىپ بولىنەدى.
ۇل بالالارعا ارنالعان مەكتەپ فورماسىنا پيدجاك، جيلەت، شالبار، كۇندەلىكتى جانە سالتاناتتى جەيدە، تۇيمەسى نەمەسە ىلگەگى بار جەيدە/كارديگان، پولو جەيدە نەمەسە فۋتبولكا (قىسقى كەزەڭ: توقىلعان جيلەت، ۆودولازكا) كىرەدى.
قىزدارعا ارنالعان مەكتەپ فورماسىنا پيدجاك، جيلەت، بەلدەمشە، شالبار، كلاسسيكالىق جەيدە، تۇيمەلەرى نە ىلگەگى بار توقىلعان كۇرتەشە/كارديگان، پولو جەيدە نەمەسە فۋتبولكا (قىسقى كەزەڭ: توقىلعان جيلەت، سارافان، ۆودولازكا) كىرەدى.
ۇلگىسى، مەكتەپ فورماسىنىڭ ءتۇسى كلاسسيكالىق ستيلدە، ءۇش تۇستەن اسپايتىن ءبىرىڭعاي ءتۇس سحەماسىندا ساقتالادى. مەكتەپ فورماسىنىڭ ءتۇسى جاعىمدى جانە اشىق تۇستەردەن تاڭدالادى، - دەپ اتاپ ءوتتى ۆەدومستۆو.
باسقارما جالپى ءبىلىم بەرەتىن مەكتەپ زايىرلى مەكەمە بولىپ تابىلاتىنىن، ول زايىرلى ەرەجەلەر مەن جالپى قابىلدانعان ىسكەرلىك ەتيكەت ەرەجەلەرىن، ونىڭ ىشىندە ءبىلىم بەرۋ مەكەمەسىنىڭ قابىرعاسىندا كيىم-كەشەك پەن باس كيىم كيۋدى ساقتاۋى ءتيىس ەكەنىن ەسكە سالدى.
مەكتەپ فورماسىنا قويىلاتىن تالاپتاردىڭ 13-تارماعىنا سايكەس، ءارتۇرلى كونفەسسيالاردىڭ ءدىني اعىمىنىڭ كيىم ەلەمەنتتەرىن قوسۋعا جول بەرىلمەيدى، - دەدى وقۋ-اعارتۋ مينيسترلىگى Tengrinews.kz ءتىلشىسىنىڭ رەسمي ساۋالىنا بەرگەن جاۋابىندا.
مينيسترلىك مەكتەپ باسشىلىعى مەكتەپ فورماسىنا قويىلاتىن تالاپتاردا رۇقسات ەتىلگەن كەيبىر كيىمدەردى كيۋگە تىيىم سالسا، اتا-انالاردىڭ قايدا شاعىمدانا الاتىنىن دا ءتۇسىندىردى.
مەكتەپ فورماسىنا قويىلاتىن تالاپتار بۇزىلعان جاعدايدا قازاقستان رەسپۋبليكاسى وقۋ-اعارتى مينيسترلىگىنىڭ ءبىلىم ساپاسىن قامتاماسىز ەتۋ كوميتەتىنە نەمەسە ونىڭ ەلىمىزدىڭ ءار وڭىرىندە ورنالاسقان اۋماقتىق بولىمشەلەرىنە حابارلاسۋ قاجەت، - دەپ حابارلادى ۆەدومستۆو.