اقش پرەزيدەنتى دجو بايدەن كۇننەن-كۇنگە ءورشىپ بارا جاتقان "وميكرونمەن" كۇرەسۋدىڭ جاڭا جوسپارىن ۇسىندى
اق ءۇي باسشىسىنىڭ ايتۋىنشا، ءۇش نەگىزگى باعىت قامتىلماي، ەپيداحۋال وڭالمايدى، دەپ حابارلايدى Almaty-akshamy.kz 24.kz-كە سىلتەمە جاساپ.
بايدەن قوسىمشا 10 مىڭ تەستىلەۋ ورتالىعىن اشىپ، ۇيدە تاپسىرۋعا بولاتىن 500 ميلليون كوۆيدكە ارنالعان تەست ساتىپ الۋدى، اۋرۋحانالارعا قوسىمشا ءبىر مىڭعا جۋىق جۇمىس كۇشىن تارتۋدى تاپسىردى.
دەموكرات حالىق اراسىندا دۇربەلەڭ سالماۋعا شاقىرىپ، بۋستەر ەكپەسىن الۋدىڭ ماڭىزدىلىعىنا توقتالدى. ول ءوز سوزىندە كوۆيد ۆاكسيناسىنىڭ بۋستەرىن ءتىپتى اقش-تىڭ ەكس-پرەزيدەنتى دونالد ترامپتىڭ ءوزى دە العانىن تىلگە تيەك ەتتى.
وسى ورايدا دەنساۋلىق ساقتاۋ سالاسىنىڭ ماماندارى 330 ميلليون امەريكالىقتىڭ 62 ميلليونى عانا بۋستەر ەكپەسىن سالدىرعانىن مالىمدەدى.
ال اقش-تاعى جاڭا ناۋقاستاردىڭ 73 پايىزى - "وميكرون" جۇقتىرعاندار.
«حالىقتىڭ كوكەيىندە "2020 جىلدىڭ ناۋرىز ايىنداعى جاعداي قايتالانۋى مۇمكىن بە؟" دەگەن سۇراق تۇر. ۋايىمداماڭىزدار، قايتالانبايدى! سەبەبى ءقازىر ءبىزدىڭ قولىمىزدا ۆاكسينا بار، ال ول كەزدە بولماعان ەدى. سوندىقتان ەكپە سالدىرۋدى كەيىنگە قالدىرماڭىزدار. بالالارىڭىزدى دا قورعاڭىزدار. وسى ۋاقىتقا دەيىن 5 پەن 11 جاس ارالىعىنداعى 6 ميلليون بالا ەكپە الىپ ۇلگىردى»، - دەدى اقش پرەزيدەنتى دجو بايدەن.