الماتىدا ناشاقورلىققا جانە ەسىرتكىنىڭ زاڭسىز اينالىمىنا قارسى كۇرەس كۇنىنە ارنالعان جىل سايىنعى گرەپپلينگ AIGA جانە برازيليالىق دجيۋ-دجيتسۋ بويىنشا «Sagadat batyr Open» حالىقارالىق اشىق ءتۋرنيرى ءوتتى، دەپ حابارلايدى اlmaty-akshamy.kz.
ءتۋرنيردى «الاتاۋ جاستارى» جاستار بىرلەستىگى، الماتى وبلىسى ءماسليحاتىنىڭ جانە ىشكى ىستەر مينيسترلىگىنىڭ قولداۋىمەن ساعادات نۇرماعامبەتوۆ اتىنداعى سپورت كلۋبى ۇيىمداستىردى. ءتۋرنيردىڭ باستى ماقساتى - سپورتتىڭ اتاۋلى ءتۇرىن ناسيحاتتاپ، سالاۋاتتى ءومىر سالتىن ۇستاۋعا شاقىرۋ.
ءىس-شارا بارىسىندا ساعادات نۇرماعامبەتوۆ اتىنداعى سپورت كلۋبىنىڭ پرەزيدەنتى ەربولات تۇرىمبەتوۆ قۇتتىقتاۋ ءسوز سويلەدى. ول جاستاردى سپورتپەن شۇعىلدانۋعا تارتۋعا ارنالعان جىل سايىنعى ءتۋرنيردى وتكىزۋدىڭ ماڭىزدىلىعى تۋرالى ايتتى.
ق ر ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى باقىتجان ءامىرحانوۆ ءوز سوزىندە ەلىمىزدە ناشاقورلىققا قارسى كۇرەس بويىنشا بەلسەندى جۇمىس جۇرگىزىلىپ جاتقانىن، ال بالالاردى دەنە شىنىقتىرۋ جانە سپورتپەن شۇعىلدانۋعا تارتۋ جامان ادەتتەرمەن كۇرەستە ماڭىزدى ءرول اتقاراتىنىن ايتتى. ول سونداي-اق ىشكى ىستەر ءمينيسترى مەن تۋريزم جانە سپورت ءمينيسترىنىڭ اتىنان قۇتتىقتاۋلاردى جەتكىزدى. مينيسترلىك وكىلدەرىنىڭ ايتۋىنشا، مۇنداي ءىس-شارالار ازاماتتارىمىزدىڭ فيزيكالىق جانە رۋحاني دامۋىنا ىقپال ەتىپ قانا قويماي، وسكەلەڭ ۇرپاق ءۇشىن سالاۋاتتى ءومىر سالتىنىڭ ۇلگىسى بولىپ تابىلادى.
«تۋرنير وتە جوعارى دەڭگەيدە ءوتتى. ءبىزدىڭ جىگىتتەردىڭ ونەرىنە وتە ريزامىن. العاشقى ەكى ورىندى سامات رامازانوۆ اتىنداعى اكادەميا مەن ساعادات نۇرماعامبەتوۆ اتىنداعى كلۋبتىڭ تاربيەلەنۋشى-سپورتشىلارى جەڭىپ الدى. مەن مۇنى ماقتان تۇتا وتىرىپ، ءارقاشان ءوز داعدىلارىم مەن تاجىريبەممەن بولىسۋگە دايىن ەكەنىمدى ايتقىم كەلەدى. كوپتەگەن جارىستاردا مەنىڭ وقۋشىلارىم جوعارى ناتيجەلەر كورسەتىپ، الەمدىك ارەنادا ەلىمىزدىڭ نامىسىن لايىقتى قورعايدى. جۇلدەلى ورىن الا الماعان بارلىق دجيتسەرلەر مەن گرەپپلەرلەرگە ۇمىتتەرىڭىزدى ۇزبەڭىزدەر دەگىم كەلەدى. سىزدەردە بارلىعى الدا. بۇگىنگى تۋرنيرگە قاتىسۋلارىڭىز - وزىندىك قۇرمەتكە لايىق. وزدەرىڭىزگە سەنىپ، ماقساتتارىڭىزعا قاراي ۇمتىلىڭىزدار»،- دەدى «الاتاۋ جاستارى» جاستار ۇيىمىنىڭ ءتوراعاسى جانە باس ۇيىمداستىرۋشى نۇرسۇلتان ورىنباساروۆ.
ول سونداي-اق AMANAT پارتياسىنىڭ، «جاستار رۋحى» جاستار قاناتىنىڭ، وبلىستىق جانە اۋداندىق اكىمدىكتەردىڭ وكىلدەرىنە، سەرىكتەستەرگە، ءىىم ارداگەرلەرىنە، وبلىستىق جانە اۋداندىق ءماسليحات دەپۋتاتتارىنا، بلوگەرلەرگە جانە بارلىق قولداۋشى اتا-انالارعا بەلسەندى قاتىسقانى ءۇشىن جەكە العىسىن ءبىلدىردى.
AMANAT پارتياسى «جاستار رۋحى» جاستار قاناتىنىڭ ءتوراعاسى اقەركە يسكاندەروۆا:
«بۇگىن ءوتىپ جاتقان ۇلكەن سپورتتىق شارامەن شىن جۇرەكتەن قۇتتىقتايمىن. ۇيىمداستىرۋشىلارعا ەسىرتكىسىز قوعام قۇرۋدا جانە جاستار اراسىندا سالاۋاتتى ءومىر سالتىن ناسيحاتتاۋدا جاساپ جاتقان جۇمىستارى ءۇشىن العىس ايتامىن. «AMANAT» پارتياسى مەن «جاستار رۋحى» دا وسىنداي باستامالارعا ءاردايىم قولداۋ كورسەتەدى. جاستارىمىز حالىقارالىق ارەنالاردا دا تۋىمىزدى جەلبىرەتىپ جۇرە بەرسىن!» - دەدى.
ءىس-شاراعا دەپۋتاتتار، سپورتشىلار، جاستار ۇيىمدارىنىڭ، وبلىستىق جانە اۋداندىق اكىمدىكتەردىڭ وكىلدەرى، ءىىم ارداگەرلەرى قوناق رەتىندە قاتىستى. جارىسقا 4 پەن 15 جاس ارالىعىنداعى 300-دەن استام جاس سپورتشىلار قاتىسىپ، ەلىمىزدىڭ ءار وڭىرلەرىنەن، سونداي-اق كورشى مەملەكەتتەردەن كەلگەن كوماندالاردى قۇرادى. ولاردىڭ اراسىندا الماتى وبلىستىق №1 بالالار ءۇيىنىڭ تاربيەلەنۋشىلەرى دە بولدى.
جۇلدەلى ورىنداردى جەڭىپ العان قاتىسۋشىلار مەن كوماندالارعا سەرىكتەستەردەن العىس حاتتار، ارنايى مەدالدار، اقشالاي جانە باعالى سىيلىقتار تابىستالدى.