الماتى قالاسىنىڭ اكىمى دارحان ساتىبالدى جۇمىس ساپارى اياسىندا ءبىرقاتار قۇرىلىس نىسانىن ارالادى.
اتاپ ايتقاندا، ولار نازاربايەۆ داڭعىلىنىڭ باتىس جاعىندا، گاندي كوشەسىنىڭ سولتۇستىگىندە ورنالاسقان جاڭا سكۆەر، سونداي-اق «التىن سيتي» جانە «جەتى قازىنا» تۇرعىن كەشەندەرىندە سالىنىپ جاتقان مەكتەپتەر، - دەپ حابارلايدى Aqshamnews.kz.
الدىمەن اكىم نازاربايەۆ داڭعىلىنىڭ باتىسىندا جانە گاندي كوشەسىنىڭ سولتۇستىگىندە ورنالاسقان سكۆەردىڭ قۇرىلىسىن كورىپ شىقتى. رەسپۋبليكا كۇنىنە وراي اشۋ جوسپارلانعان نىسان ءقازىر 97% دايىن.
سكۆەر اۋماعىندا قىستا مۇز ايدىنى رەتىندە پايدالانىلاتىن توعان سالىندى. بۇگىندە جۇرگىنشىلەر مەن جۇگىرۋ جولدارى، اسفالت جابىندىسى، اۆتوسۋارۋ جانە سىرتقى جارىقتاندىرۋ جۇيەسىن ورناتۋ جۇمىستارى اياقتالۋعا جاقىن. 95 قىلقانجاپىراقتى جانە 228 جاپىراقتى كوشەت وتىرعىزىلدى، قوسىمشا 469 قىلقانجاپىراقتى جانە 384 جاپىراقتى بۇتا، سونداي-اق كوپجىلدىق وسىمدىكتەر ەگىلگەن. سونىمەن قاتار ەسكى قورشاۋدىڭ مەتالل قۇرىلىمدارى مەن ىرگەتاسىنا رەستاۆراسيا جۇمىستارى جۇرگىزىلىپ جاتىر.
قۇرىلىس تولىق اياقتالعان سوڭ سكۆەر قالا تۇرعىندارى مەن قوناقتارى ءۇشىن جاڭا دەمالىس ايماعىنا اينالماق. دارحان ساتىبالدى جارىق شامدارىنىڭ سانىن ارتتىرۋدى جانە كوگالداندىرۋ كەزىندە جەرگىلىكتى تالدار مەن بۇتالاردىڭ تۇرىنە باسىمدىق بەرۋدى تاپسىردى.
ءارى قاراي اكىم «التىن سيتي» تۇرعىن كەشەنىندە 1 500 ورىندىق مەكتەپتىڭ قۇرىلىس بارىسىمەن تانىستى. جوبا «كەلەشەك مەكتەپتەرى» ۇلتتىق جوباسى اياسىندا قولعا الىنعان. قازىرگى دايىندىق دەڭگەيى 70%. قۇرىلىسقا 130 جۇمىسشى جانە 8 بىرلىك ارنايى تەحنيكا جۇمىلدىرىلعان. نىساندى وسى جىلدىڭ سوڭىنا دەيىن پايدالانۋعا بەرۋ جوسپارلانعان.
جوبا بويىنشا مەكتەپ اۋماعىندا فۋتبول الاڭى، سپورت جانە اكت زالى، اسحانا، ويىن جانە سپورت الاڭشالارى، سونداي-اق كورىكتەندىرىلگەن اۋماق قاراستىرىلعان. مەكتەپ زاماناۋي جابدىقتارمەن جانە ۇلتتىق ستاندارتتارعا ساي وقۋ كابينەتتەرىمەن قامتاماسىز ەتىلەدى.
ساپار سوڭى «جەتى قازىنا» تۇرعىن كەشەنىنىڭ ماڭىندا سالىنىپ جاتقان 2 000 ورىندىق مەكتەپپەن اياقتالدى. بۇل جوبا دا «كەلەشەك مەكتەپتەرى» ۇلتتىق جوباسى اياسىندا بوي كوتەرىپ جاتىر. نىسان 40% دايىن. قۇرىلىسقا 95 جۇمىسشى جانە 10 بىرلىك تەحنيكا تارتىلعان. مەكتەپتى دە جىل سوڭىنا دەيىن پايدالانۋعا بەرۋ كوزدەلىپ وتىر. وندا زاماناۋي وقۋ كابينەتتەرى، سپورت جانە اكت زالدارى، فۋتبول الاڭى، اسحانا، بالالار الاڭشالارى مەن كورىكتەندىرىلگەن اۋماق بولادى.
جۇمىس ساپارىن قورىتىندىلاعان قالا اكىمى بارلىق قۇرىلىس نىسانىندا جۇمىسشىلار مەن ارنايى تەحنيكانىڭ سانىن كوبەيتۋدى، سونداي-اق قۇرىلىس جۇمىستارىن مەرزىمىندە اياقتاۋدى تاپسىردى.