ديزەل وتىنىن ساتىپ الۋعا تاۋلىكتىك ليميت قويىلۋى مۇمكىن

ەنەرگەتيكا ءمينيسترى بۇيرىعىنىڭ جوباسى جاريالاندى.

وندا ديزەل وتىنى باعاسىن تۇرعىلىقتى جەرىنە، تۇتىنۋ كولەمىنە جانە كولىك تۇرىنە قاراي سارالاۋ قاراستىرىلعان، دەپ حابارلايدى Almaty-akshamy.kz.

قۇجات جوباسى «اشىق نقا» پورتالىندا جاريالاندى.

اقمولا، اقتوبە، شىعىس قازاقستان، باتىس قازاقستان، قوستاناي، سولتۇستىك قازاقستان، سونداي-اق اباي وبلىستارىندا ديزەل وتىنى باعاسى مىناداي مولشەردە بەلگىلەنگەن:

قازاقستان رەسپۋبليكاسىندا بەرىلگەن جەكە كۋالىگىن كورسەتكەن كەزدە، قازاقستان رەسپۋبليكاسىنىڭ ازاماتتارىنا 1 تاۋلىكتە 100 ليترگە دەيىنگى كولەمدە - 1 ليترگە 260 تەڭگە؛

قازاقستان رەسپۋبليكاسىندا بەرىلگەن جەكە كۋالىگىن جانە جۇك، ارنايى، مامانداندىرىلعان اۆتوموبيلدەر مەن اۆتوبۋستارعا تەحنيكالىق پاسپورتىن كورسەتكەن كەزدە، قازاقستان رەسپۋبليكاسىنىڭ ازاماتتارىنا 1 تاۋلىكتە 300 ليترگە دەيىنگى كولەمدە - 1 ليترگە 260 تەڭگە؛

نۇر-سۇلتان، الماتى، شىمكەنت قالالارىندا، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ، سونداي-اق جەتىسۋ، ۇلىتاۋ وبلىستارىندا قازاقستان رەسپۋبليكاسىندا بەرىلگەن جەكە كۋالىگىن كورسەتكەن كەزدە، قازاقستان رەسپۋبليكاسىنىڭ ازاماتتارىنا 1 تاۋلىكتە 100 ليترگە دەيىنگى كولەمدە - 1 ليترگە 230 تەڭگە؛

قازاقستان رەسپۋبليكاسىندا بەرىلگەن جەكە كۋالىگىن جانە جۇك، ارنايى، مامانداندىرىلعان اۆتوموبيلدەر مەن اۆتوبۋستارعا تەحنيكالىق پاسپورتىن كورسەتكەن كەزدە، قازاقستان رەسپۋبليكاسىنىڭ ازاماتتارىنا 1 تاۋلىكتە 300 ليترگە دەيىنگى كولەمدە - 1 ليترگە 230 تەڭگە؛

بەلگىلەنگەن كولەمنەن جوعارى نەمەسە ساتۋدىڭ وزگە دە جاعدايلارى ءۇشىن - 1 ليترگە 450 تەڭگە.

قۇجاتتى قوعامدىق تالقىلاۋ 2022 جىلدىڭ 18 تامىزىنا دەيىن جالعاسادى.