قالالىق جوسپارلاۋ جانە ۋربانيستيكا باسقارماسىنىڭ قىزمەتكەرلەرى اۋدان اكىمدىگىنىڭ وكىلدەرىمەن بىرلەسىپ جەرگىلىكتى جەرلەردەگى كوممەرسيالىق نىسانداردىڭ مەنشىك يەلەرىنە ءتۇسىندىرۋ جۇمىستارىن جۇرگىزدى.
«بۇگىن المالى اۋدانىنىڭ ساۋدا ۇيلەرىنىڭ ءبىرىنىڭ كاسىپكەرلەرىمەن كەزدەستىك، ولارعا بۇرىن زاڭسىز جارنامانى الىپ تاستاۋ تۋرالى حابارلاما بەرىلگەن بولاتىن. كەيبىرى مۇنى وزدەرى جاسادى، ال ەندى بىرىنە جاڭا نورمالاردى قوسىمشا ءتۇسىندىرۋ قاجەت بولدى. جالپى، ءبىز بيزنەس وكىلدەرىنە 900-گە جۋىق حابارلاما بەردىك، ياعني بۇكىل قالانىڭ سىرتقى كەلبەتىن جاقسارتۋ جونىندەگى جۇيەلى جۇمىستى جالعاستىرامىز»، - دەدى باسقارما باسشىسى نۇرلان بورانبايەۆ.
ەستەرىڭىزگە سالا كەتەيىك، 2023 جىلى جەلتوقساندا قالا ءماسليحاتى بەكىتكەن الماتىنىڭ جاڭا ديزاين-كودى ءارتۇرلى اقپاراتتى جازۋعا جانە تولتىرۋعا قاتاڭ تالاپتار قويادى. بۇل ماڭدايشالار، جارنامالىق قۇرىلىمدار جانە كەز كەلگەن باسقا سىرتقى اقپارات، سونداي-اق عيماراتتاردىڭ ءبىرىنشى جانە ەكىنشى قاباتتارىنداعى تۇرعىن ەمەس كەڭىستىكتەردىڭ تۇستەرى مەن ارلەۋ ماتەريالدارى. بۇل ەلەمەنتتەردىڭ بارلىعى قاسبەتتىڭ ارحيتەكتۋرالىق ستيلىمەن ۇيلەسىپ، عيمارات ارحيتەكتۋراسىنىڭ تۇتاستىعىن بۇزباۋى كەرەك.
ايتا كەتۋ كەرەك، مەگاپوليس اكىمى ەربولات دوسايەۆتىڭ تاپسىرماسىنا سايكەس ديزاين-كود كەزەڭ-كەزەڭىمەن ەنگىزىلىپ وتىر. قولدانىستاعى نىساندارعا كاسىپكەرلەردى ديزاين-كود قاعيداتتارىن بەلسەندى ەنگىزۋگە ىنتالاندىرۋ ءۇشىن كەشەندى ءتاسىل قاراستىرىلعان. جاڭا نىساندار ءۇشىن ۇسىنىستار مەن تالاپتاردىڭ تولىق كولەمى قولدانىلادى.
