حالىق اقىنى كەنەن ازىربايەۆ اندەرىنەن ءداستۇرلى انشىلەر اراسىندا رەسپۋبليكالىق كونكۋرس باستالدى.
ستۋدەنتتەر اراسىندا ۇيىمداستىرىلعان بايقاۋعا قىتايدان، موڭعوليادان، وزبەكستاننان ونەرپازدار قاتىستى، دەپ حابارلايدى Almaty-akshamy.kz 24.kz-كە سىلتەمە جاساپ.
سال-سەرىلىك ءداستۇردىڭ سوڭعى تۇياعى كەنەن ازىربايەۆ التىن قورعا 130-دان استام ءان، 7 كۇي قالدىرعان. ۇيىمداستىرۋشىلاردىڭ ايتۋىنشا، باس جۇلدە – 700 مىڭ تەڭگە. سايىسقا 40 قاتىسۋشى اراسىنان 25 ۇمىتكەر ىرىكتەلىپ الىندى. ءبىرىنشى تۋردا جەڭىمپاز اتانعاندار كەلەسى تۋرعا وتەدى.
«رەسپۋبليكامىزداعى سال-سەرىلەرىمىزدى ناسيحاتتاۋ. ونىڭ ىشىندە كەنەن ازىربايەۆتىڭ اندەرىن ناسيحاتتاۋ كەرەك. نەگىزى بۇرىن ايتىلماي قالدى. اراگىدىك بىر-ەكى انشىلەر ايتاتىن. ەندى وسى اندەردى جۇيەگە كىرگىزۋ كەرەك قوي»، - قازاقستاننىڭ حالىق ءارتىسى قايرات بايبوسىنوۆ.
«قازاقتىڭ بەلگىلى اقىنى، كەنەن ازىربايەۆتىڭ تۋعانىنى 140 جىل تولىپ وتىر. بۇل مەرەكە قازاقستاننىڭ ءار قالاسىندا، وبلىس ورتالىقتارىندا ءار جەردە ءىس شارالار جۇرگىزىپ جاتىر. سول ءىس-شارانىڭ بىرەۋى، مىنەكەي، استانا قالاسىندا تۇڭعىش رەت كەنەن ازىربايەۆ اندەرىنەن كونكۋرس وتكىزىپ جاتىر. كونكۋرستىڭ ءبىر ەرەكشەلىگى كاسىپقوي انشىلەر شىقپايدى. جاستارعا ارنالعان»، - دەيدى ك.ازىربايەۆتىڭ ۇلى باقىتجان ازىربايەۆ.