ديرەكتورلار ءبىر مەكتەپتى 7 جىلدان ارتىق مەرزىم باسقارا المايدى.
بۇل جايىندا ءماجىلىس دەپۋتاتتارىنىڭ ساۋالىنا ق ر پرەمەر-مينيسترىنىڭ ورىنباسارى ەرالى توعجانوۆتىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىلىم بەرۋ ۇيىمىنا تاعايىندالعاننان كۇننەن باستاپ 4 جىل لاۋازىمدى قىزمەتتە بولعان باسشىلار روتاسيالانادى. بۇل رەتتە ءبىرىنشى باسشىنىڭ ءبىر ءبىلىم بەرۋ ۇيىمىندا لاۋازىمدى قىزمەت اتقارۋىنا رۇقسات ەتىلگەن ەڭ ۇزاق مەرزىم 7 جىلدان اسپايدى»، - دەلىنگەن ۇكىمەت باسشىسى ورىنباسارىنىڭ جاۋابىندا.
ونىڭ اتاپ وتۋىنشە، روتاسيا جۇرگىزۋ ءۇشىن ءبىلىم بەرۋ باسقارماسىنىڭ كادر قىزمەتى اۋىسۋى ءتيىس ءبىرىنشى باسشىلاردىڭ ءتىزىمىن ازىرلەيدى. پەداگوگتاردى اتتەستاسيادان وتكىزۋ ەرەجەسى مەن تارتىبىنە سايكەس، ءبىرىنشى باسشى جۇمىسىنىڭ تيىمدىلىك كورسەتكىشتەرى بويىنشا ەسەپ تۇزىلەدى. ول جۇمىس باعىتتارى بويىنشا 10-نان استام ولشەمشارتتى قامتيدى.
«تيىمدىلىك كورسەتكىشتەرىنە قاتىستى مالىمەتتەردى ءبىلىم بەرۋ باسقارمالارىنىڭ، ادىستەمەلىك كابينەتتەردىڭ، بۇقارالىق اقپارات قۇرالدارىنىڭ، ءبىلىم سالاسىنداعى قوعامدىق بىرلەستىكتەردىڭ وكىلدەرىنەن جاساقتالعان جانە ماتەريالداردى شىنايى ءارى جان-جاقتى زەردەلەۋ ءۇشىن كونسۋلتاتيۆتىك-كەڭەس ورگانى سانالاتىن كوميسسيا قارايدى. اتەستاتتاۋ ەرەجەلەرىندە كورسەتكىشتەر بويىنشا ولشەمشارتتار مەن ءتيىستى باللدار ايقىندالعان. بۇل جەمقورلىق تاۋەكەلدەرىن تومەندەتەدى. روتاسيالاناتىن ءبىرىنشى باسشى قويىلعان باللدىڭ دۇرىستىعىن، نەگىزدىلىگىن قايتادان تەكسەرە الادى»، - دەدى ەرالى توعجانوۆ.