ۇلتتىق ەكونوميكا ۆيسە-مينيسترى ب. وماربەكوۆتىڭ ايتۋىنشا، اۋىلدىق جەرلەردە كادرلىق الەۋەتتى ارتتىرۋ ماقساتىندا جۇزەگە اسىرىلىپ جاتقان «ديپلوممەن اۋىلعا» جوباسى ەلدەگى ەڭ ءتيىمدى الەۋمەتتىك باستامالاردىڭ ءبىرى سانالادى.
جوبا اياسىندا ماماندارعا الەۋمەتتىك قولداۋ شارالارى قاراستىرىلعان:
- 100 اەك كولەمىندە ءبىرجولعى كوتەرمە جاردەماقى،
- 2500 اەك-كە دەيىنگى جەڭىلدىكتى نەسيە تۇرعىن ءۇي ساتىپ الۋعا بەرىلەدى.
2009 جىلدان 2024 جىلعا دەيىنگى كەزەڭدە:
- 114 مىڭنان استام جاس مامان كوتەرمە جاردەماقى العان،
- 52 مىڭنان استام مامان جەڭىلدىكتى نەسيەگە قول جەتكىزىپ، باسپاناعا يە بولعان.
ب. وماربەكوۆ اتاپ وتكەندەي، باعدارلاماعا قاتىسۋشىلاردىڭ باسىم بولىگى – جاستار، ولاردىڭ اراسىندا مۇعالىمدەر، دارىگەرلەر، اگرونومدار، ينجەنەرلەر جانە اۋىل شارۋاشىلىعى ماماندارى كوپ.
بۇل باستاما بيىلعى جۇمىسشى ماماندىقتار جىلى جاريالانۋىمەن ەرەكشە ۇندەسىپ وتىر. پرەزيدەنت قاسىم-جومارت توقايەۆ ءوز جولداۋىندا ەڭبەك ادامىنىڭ مارتەبەسىن كوتەرۋدىڭ، ەلدى دامىتۋ ءۇشىن جۇمىسشى جانە تەحنيكالىق ماماندىقتاردى قولداۋدىڭ ماڭىزدىلىعىن اتاپ وتكەن ەدى.
«ديپلوممەن اۋىلعا» جوباسى – اۋىلدى جەرلەردەگى كادر تاپشىلىعىن ازايتىپ قانا قويماي، جاستاردىڭ تۋعان جەرىندە ەڭبەك ەتۋگە ىنتالاندىرۋدىڭ ناقتى تەتىگى. ول اۋىلداردا بىلىكتى مامانداردىڭ تۇراقتاۋىنا، جاڭا جۇمىس ورىندارىنىڭ پايدا بولۋىنا جانە جەرگىلىكتى ەكونوميكانىڭ دامۋىنا سەرپىن بەرىپ وتىر.