تانىمال ءانشىنىڭ الماتىنىڭ ورتالىق ستاديونىندا وتەتىن جەكە ءان كەشىنە ارنالعان بيلەتتەردىڭ 90% ساتىلىپ كەتكەن.
ءتىپتى ونەر يەسىنىڭ شەتەلدىك تىڭدارماندارى دا الىستان ات ارىتىپ الماتىعا كەلىپ جاتىر. كەيبىر قوناق ۇيلەردە بوس ورىن قالماپتى. ءانشى ديماش قۇدايبەرگەننىڭ كونسەرتىن اسىعا كۇتىپ جۇرگەندەر كوپ، دەپ حابارلايدى Almaty-akshamy.kz 24.kz-كە سىلتەمە جاساپ.
ءقازىردىڭ وزىندە 21 مىڭنان استام بيلەت ساتىلىپ كەتكەن. بۇل – جالپى بيلەت سانىنىڭ 90%. ول تەك كونسەرت وتەتىن ورتالىق ستاديونداعى نەگىزگى ورىن عانا. ودان بولەك فاناتتار ايماعىندا، ياعني ساحنا الدىندا تاعى 10 مىڭعا جۋىق كورەرمەن كونسەرتتى تاماشالاي الادى.
«بيلەتتىڭ باعاسى 8-10 مىڭ تەڭگەدەن باستالىپ، ساحناعا جاقىن ورىنداردىڭ قۇنى 40 مىڭ تەڭگەگە دەيىن جەتتى. ءقازىر فانايماقتا 10 مىڭ تەڭگەلىك جانە قىمبات ورىنداردىڭ بيلەتتەرى عانا بار. بيلەت ساتىلىمعا شىققان كۇننەن بەرى ساتىپ الۋشىلاردىڭ سانى ارتىپ جاتىر»، - دەيدى ونلاين بيلەت ساتاتىن كومپانيانىڭ باس ديرەكتورى ۆيكتوريا تورگۋناكوۆا.
الەمگە تانىمال ونەر يەسىنىڭ شەتەلدىك جانكۇيەرلەرى دە از ەمەس. ساتىلعان بيلەتتەردىڭ 5 مىڭعا جۋىعىن وزگە ەلدىڭ تىڭدارماندارى يەلەنگەن. ناقتىراق ايتساق، ششۆەيساريا، فرانسيا، ۋكراينا، جۇڭگو، كاتار، اقش، برازيليا جانە ارگەنتينا سىندى جالپى سانى 50 ەلدىڭ ازاماتتارى كونسەرتكە بيلەت الىپتى. ءتىپتى ءبىرقاتار قوناق ۇيلەردە ءقازىردىڭ وزىندە بوس ورىن قالماعان.
«اعىمداعى جىلدىڭ ەكىنشى توقسانىنىڭ قورىتىندىسى بويىنشا، الماتى قالاسىنداعى قوناق ۇيلەردىڭ تولۋى 38،4% قۇرادى. ول وتكەن جىلدىڭ سايكەس ۋاقىتىمەن سالىستىرعاندا 13،7% ءوستى. ال كەيبىر كۇندەرى بەلگىلى ءبىر ءىس-شارا وسىنداي ديماش قۇدايبەرگەننىڭ كونسەرتتەرىنە بايلانىستى قوناق ۇيلەردىڭ تولۋى 80% دەيىن جەتەدى»، - قالالىق تۋريستىك-اقپاراتتىق ورتالىق ديرەكتورىنىڭ ورىنباسارى باۋىرجان پازىلحايىر.
ءانشىنىڭ كونسەرتىنە ارنالعان بيلەتتەر 14 شىلدەدەن باستاپ ساۋداعا شىعارىلعان. العاشقى ەكى تاۋلىكتە 10 مىڭنان اسا بيلەت ساتىلىپتى. ديماش قۇدايبەرگەننىڭ جەكە كونسەرتى 23 قىركۇيەك كۇنى كەشكى ساعات سەگىزدە ورتالىق ستانديوندا وتەدى.