قازاقستان جاھاندىق ازىق-تۇلىك تاپشىلىعىمەن كۇرەسۋگە دايىن.
حاب ورتالىق ازيا مەن اۋعانستان ءۇشىن قىزمەت ەتەتىن بولادى. بۇل تۋرالى پرەزيدەنت قاسىم-جومارت توقايەۆتىڭ نيۋ-يورككە جۇمىس ساپارى بارىسىندا بەلگىلى بولدى، دەپ حابارلايدى Almaty-akshamy.kz.
پرەزيدەنت ساپارىنىڭ نەگىزگى ماقساتى – بۇۇ باس اسسامبلەياسىنىڭ 77 سەسسياسىنا قاتىسۋ. جالپى دەباتتا ءسوز سويلەگەن توقايەۆ مەملەكەتتەر ەگەمەندىگىنىڭ تەڭدىگى، تەرريتوريالىق تۇتاستىعى جانە ەلدىڭ بەيبىت ءومىر ءسۇرۋى سەكىلدى قاعيداتتى ساقتاۋىمىز كەرەك دەدى. ۇيىمنىڭ باستى ۇستانىمى دا سول.
سونىمەن قاتار، ەكونوميكالىق جانە ساياسي سانكسيالار ازىق-تۇلىك قاۋىپسىزدىگىن قامتاماسىز ەتۋ تىزبەگىن جويىپ، ميلليونداعان ادامعا، اسىرەسە قوعامنىڭ وسال توپتارىنا ءقاۋىپ توندىرەتىن «جاڭا نورماعا» اينالعانىن جەتكىزدى. بۇل ماسەلە تەز ارادا شەشىمىن تابۋ كەرەك دەگەن مەملەكەت باسشىسى قازاقستان جاھاندىق ازىق-تۇلىك تاپشىلىعىمەن كۇرەسۋگە دايىن ەكەنىن مالىمدەدى.