ديماش قۇدايبەرگەننىڭ تۋعان كۇنى مالايزيادا ەرەكشە اتالىپ ءوتتى

قازاقستاندىق ءانشىنىڭ فاناتتارى قاتەرلى ىسىكپەن كۇرەسىپ جاتقان بالالارعا كومەكتەستى

مەرەكە دجوردجتاۋن قالاسىنداعى اۋرۋحانادا ءوتتى. ديماش فان-كلۋبىنىڭ مۇشەلەرى مەن ولاردىڭ دوستارى 35 بالاعا ويىنشىقتار، كادەسىيلار جانە جەكە گيگيەنا قۇرالدارىن سىيعا تارتتى، دەپ حابارلايدى Almaty-akshamy.kz 24.kz-كە سىلتەمە جاساپ. 

قازاقستان ەلشىلىگىنىڭ وكىلى فان-كلۋب پەن اۋرۋحانانىڭ كىشكەنتاي ەمدەلۋشىلەرىنە قازاقستانعا بايلانىستى ەستەلىك سىيلىقتار تابىس ەتتى.

ادەتتەگىدەي تۋعان كۇن داستارحانىندا ديماشتىڭ بەينەسى بار تورت بولدى. قازاقستاندىق ءانشى بۇگىن 28 جاسقا تولدى. ونىڭ جانكۇيەرلەرى مالايزيادا جىل سايىن 24 مامىردا كۋميرىنە ارنالعان ءتۇرلى شارالار وتكىزەدى.

"ديماش – ءبارى ءبىر-بىرىن ويلايتىن، ءبىرتۇتاس الەمدى كورۋدى ارماندايتىن، قازاقتىڭ اسا قۇرمەتتى ونەرپازى. ونىڭ جىرلارىنداعى لەبىزدەرى كوپتىڭ جۇرەگىن ەلجىرەتىپ، يگى ىستەرگە باۋليدى. ديماش بالالاردى قولدايدى، ويتكەنى ولار – ءبىزدىڭ بولاشاعىمىز. ونىڭ تۋعان كۇنىنە وراي، جانكۇيەرلەرى قاتەرلى ىسىككە شالدىققان بالالارعا قولداۋ كورسەتىپ، ولارعا سىيلىقتار جىبەرۋ ارقىلى ماحاببات پەن قۋانىشپەن ءبولىسۋدى شەشتىك. بۇل ولاردىڭ كوڭىل-كۇيلەرىن كوتەرىپ، ەمدەلۋ جولىندا ولاردىڭ جۇزدەرىنە كۇلكى سىيلاسىن"، - دەدى ديماشتىڭ جانكۇيەرلەر كلۋبىنىڭ ادمينيستراتورى ازۋا الي.