ديماش جاساعان ءجۇرىس

ەلوردادا شاحماتتان الەم چەمپيونى اتاعى ءۇشىن رەسەيلىك يان نەپومنياششيي مەن قىتايلىق دين ليجەن اراسىنداعى ماچتىڭ 12ء-شى پارتياسى ءوتىپ جاتىر.

اتالعان پارتيانى الەمگە بەلگىلى ءانشى ديماش قۇدايبەرگەن سيمۆوليكالىق ءجۇرىس جاساپ، باستاپ بەردى. كەيىن قازاقپارات ءتىلشىسىنىڭ ساۋالىنا جاۋاپ بەرگەن ونەر يەسى ماچقا قاتىستى ءوز پىكىرىمەن ءبولىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«وسىنداي شاراعا شاقىرعانىنا وتە قۋانىشتىمىن. شەتەلدەن كەلگەن قوناقتارعا «قوش كەلدىڭىزدەر!» دەپ ايتامىن. ءوزىم شاحمات ويناي قويمايمىن. ءبىراق بۇل مەن ءۇشىن ۇلكەن مارتەبە بولدى»، - دەدى ديماش قۇدايبەرگەن.

ەسكە سالايىق، 9 ساۋىردە اتالعان قوس سپورتشى اراسىنداعى ماچتى حالىقارالىق شاحمات فەدەراسياسىنىڭ (FIDE) پرەزيدەنتى اركاديي دۆوركوۆيچ پەن مادەنيەت جانە سپورت ءمينيسترى اسحات ورالوۆ باستاپ بەرگەن ەدى. 

رەگلامەنتكە سايكەس، الەم چەمپيونى اتاعى ءۇشىن ماچ 14 پارتيادان قۇرالعان. تەڭ ەسەپ تىركەلگەن جاعدايدا 4 پارتيادان تۇراتىن تاي-برەيك بەلگىلەنەدى. ەگەر تاي-برەيكتە دە جەڭىمپاز انىقتالماسا، شاحماتشىلار بليستە شەبەرلىك بايقاسادى. ودان ءارى «ءولىم پارتياسى» بار.

شاحماتتان الەم چەمپيوناتى استانادا 7 ءساۋىر باستالعان بولاتىن. وندا رەسەيلىك يان نەپومنياششيي (فيدە) مەن قىتايلىق دين ليجەن الەم چەمپيونى اتاعىنا تالاسىپ جاتىر.