جانەل مەن ازامات 10 جىلدان استام ۋاقىت بويى ساحنادا جۇپتاسىپ بيلەپ كەلەدى.
الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىنا حالىقارالىق بي كۇنى قارساڭىندا اباي اتىنداعى قازاق ۇلتتىق وپەرا جانە بالەت تەاترىنىڭ جەتەكشى سوليستەرى جانەل تۇكەيەۆا جانە ازامات اسقاروۆ شاقىرىلدى، دەپ حابارلايدى Almaty-akshamy.kz
جانەل تۇكەيەۆا تەاتردا 2006 جىلدان بەرى جۇمىس ىستەيدى. كوردەبالەت ارتىسىنەن باستاپ تەاتردىڭ جەتەكشى بالەريناسىنا دەيىنگى بارلىق جولدى ءوتتى.. جانەلدىڭ اكەسى - مۇرات تۇكەيەۆ - قازاقستان رەسپۋبليكاسىنىڭ ەڭبەك سىڭىرگەن ءارتىسى، اناسى مايرا تۇكەيەۆا - ق ر ەڭبەك سىڭىرگەن مادەنيەت قايراتكەرى.
"مەن تۋعاننان باستاپ اتا-اناممەن تەاتردا، بالەت زالىندا بولدىم. سول كەزدەن باستاپ بويىما بالەتكە دەگەن سۇيىسپەنشىلىكتى ءسىڭىردىم. حورەوگرافيالىق ۋچيليششەگە تۇسەمىن بە دەگەن ماسەلە تۋىنداعان كەزدە اتا-انام مەنى اينىتپاق بولدى، ءبىراق مەن بالەرينا بولۋعا شەشىم قابىلدادىم"، - دەدى جانەل.
بالەرينانىڭ ءوزى ەكى قىز تاربيەلەپ وتىر، ولاردىڭ ءبىرى اناسىنىڭ جولىن جالعاۋدى ارماندايدى.
ازامات اسقاروۆتىڭ دا بيشىلىك جولى ارىپتەسىنە ۇقساس، ول تەاترعا 2009 جىلى قىزمەتكە كەلگەن. ونىڭ اتا-اناسى دا بالەت ارتىستەرى. بالەت ازاماتقا كوشباسشىلىق قاسيەتتەردى دارىتتى. باستاپقىدا ول بالەتكە بىردەن عاشىق بولماسا دا، ءوزىنىڭ جەتىستىكتەرىن كورگەننەن كەيىن ونىڭ كاسىبىنە اينالعان شىعارماشىلىقتى جالعاستىردى.
"اتا-انام مەنىڭ ساباقتارىما قاتاڭ قارادى. بالەتكە دەيىن مەن سپورتتىق گيمناستيكامەن اينالىستىم، سودان كەيىن مەنى بالەت مەكتەبىنە بەردى. جۇمىس كەزىندە ەۋروپادا، اقش-تا كوپ تاعىلىمدامادان ءوتتىم، بۇل تاجىريبە الماسۋ بولدى"، - دەپ اتاپ ءوتتى بالەت ءارتىسى.
اباي اتىنداعى قازاق ۇلتتىق وپەرا جانە بالەت تەاترى بالەتىنىڭ جەتەكشى سوليستەرى ءوز جۇمىس كۇندەرىنىڭ ادەتتە تاڭعى ساعات 10-دا جاتتىعۋ ساباعىنان باستالاتىنىن، وندا ولار ستانوكتا ءبىرقاتار جاتتىعۋلار، سەكىرۋلەر جاسايتىنىن، سودان كەيىن تەاتر رەپەرتۋارىنا سايكەس جاتتىعۋلار باستالاتىنىن ايتتى. تەاتردىڭ جەتەكشى سوليستەرىندە كەم دەگەندە 2،5 ساعاتتىق جاتتىعۋلار بار. ال كوردەبالەت ارتىستەرىندە كۇنىنە ون ساعات، ءتىپتى ودان دا كوپ ۋاقىتتى الاتىن جاتتىعۋلار بار.
جانەل ءوزى كوردەبالەتتە 4،5 جىل ءجۇرىپ، جەتەكشى سوليستكە دەيىن باردى. ول بالەتتەگىدەي، وپەرامەن دا اينالىستى. ايتا كەتۋ كەرەك، ول سانكت-پەتەربۋرگ قالاسىنداعى ورىس بالەت اكادەمياسىندا ءبىر جىلدىق تاعىلىمدامادان ءوتتى.
"بالەتتە جۇمىس ىستەۋ وڭاي ەمەس، بۇل ەڭ الدىمەن ءوزىڭ ءۇشىن وتە قيىن جۇمىس. بالەت ارتىستەرى ءاردايىم وزدەرىن فورمادا ۇستايدى"، - دەپ ءبولىستى بالەرينا.
ايتپاقشى، جانەل مەن ازامات 10 جىلدان استام ۋاقىت بويى ساحنادا جۇپتاسىپ بيلەپ كەلەدى. ارتىستەر وزدەرىنىڭ جاتتىعۋلارى باسقالارمەن بىردەي وتپەيتىنىن مويىندايدى. ەگەر تۇسىنىسپەۋشىلىك بولىپ السا، ولار ازىلگە ۇلاستىرىپ جىبەرۋگە تىرىسادى.
ءسوز سوڭىندا بالەت ارتىستەرى كورەرمەندەردى تەاترعا كەلۋگە شاقىردى.
"تەاترعا كەلگەن بارلىق كورەرمەندەر ساحنادا نە تۋرالى بولىپ جاتقانىن ءاردايىم تۇسىنە بەرمەيدى. مۇنداي كورەرمەندەر ءۇشىن مەن تەاترعا ءسال ەرتەرەك كەلىپ، اتموسفەراعا ەنۋدى ۇسىنار ەدىم. بالەت ءۇنسىز جانر بولعاندىقتان، ءبىز بارلىق سەزىمدەرىمىزدى يشارا مەن قوزعالىس ارقىلى بىلدىرەمىز"، - دەيدى جانەل تۇكەيەۆا.