قارۋ ۇرلاۋ جانە ساقتاۋ فاكتىسى بويىنشا 519 تەرگەۋ امالى جۇرگىزىلدى
قاڭتارداعى جاپپاي تارتىپسىزدىكتەرگە ا.جۇماگەلدييەۆتىڭ (ديكيي ارمان) «قازاقستاندىق» جانە «ايشۋاق-جانتۇگەل» توپتارىنىڭ قاتىسى بارى انىقتالدى. بۇل تۋرالى ق ر باس پروكۋراتۋراسى 1 قىزمەت باستىعىنىڭ ورىنباسارى ەلدوس قيلىمجانوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇعان دەيىن حابارلانعانىمىزداي، قۇزىرلى ورگاندار قاڭتارداعى جاپپاي تارتىپسىزدىككە قىلمىستىق توپ مۇشەلەرىنىڭ قاتىسقانىن انىقتادى. ول - ارمان جۇماگەلدييەۆتىڭ (ديكيي ارمان) «قازاقستاندىق» جانە «ايشۋاق-جانتۇگەل» توپتارى. ولاردىڭ قىلمىستىق ارەكەتىنەن ازاماتتار زارداپ شەكتى، قازا بولعاندار دا بار. ۇيىمداسقان قىلمىستىق توپتىڭ 24 مۇشەسى جازاعا تارتىلدى»، - دەدى ەلدوس قيلىمجانوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق، باس پروكۋراتۋرا وكىلى جاپپاي تارتىپسىزدىكتەر كەزىندە ۇرلانعان قارۋعا قاتىستى مالىمەتپەن ءبولىستى.
«قارۋ ۇرلاۋ جانە ساقتاۋ فاكتىسى بويىنشا 519 تەرگەۋ امالى جۇرگىزىلدى. ول بويىنشا 183 تۇلعا كۇدىككە ءىلىنىپ، 154 ادام سوتتالدى. جاپپاي تارتىپسىزدىكتەر كەزىندە 10 اڭشىلىق دۇكەنى تونالىپ، ول جەردەن 1 672 مىلتىق ۇرلاندى. ودان بولەك، 1 288 قىزمەتتىك قارۋ قولدى بولدى. ۇرلانعان قارۋلاردىڭ ۇشتەن ءبىرى (958 قارۋ) تابىلدى. بۇگىندە 2 مىڭنان استام قارۋ ءالى بوگدەنىڭ قولىندا. ونىڭ قاتارىندا گراناتالار، اۆتوماتتار، مىلتىقتار، تاپانشالار مەن گراناتا اتقىشتارى بار. سونىمەن قاتار ازاماتتار ءوز ەركىمەن 119 قارۋدى تاپسىردى»، - دەيدى ول.
ايتا كەتەيىك، اتالعان ۆەدومستۆو قاڭتار وقيعاسى كەزىندە 238 ادامنىڭ قازا تاپقانىن تاعى ءبىر ناقتىلادى.