پاندەميا اياقتالعاننان كەيىن بۇل «جاس قىراندىقتاردىڭ» العاشقى سالتاناتتى جيىنى
ق ر تاۋەلسىزدىك كۇنى قارساڭىندا N87 ورتا مەكتەپ وقۋشىلارىنىڭ ەلىمىزدىڭ ءبىرىڭعاي بالالار مەن جاسوسپىرىمدەر قوعامدىق ۇيىمى قاتارىنا قوسىلۋىنا وراي سالتاناتتى ساپ تۇزەۋ ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
1-سىنىپتاعى 215 وقۋشىنىڭ انتىن قابىلداپ، بۇگىننەن باستاپ قازاقستانداعى بارشا مەكتەپ وقۋشىلارىنىڭ باسىن بىرىكتىرەتىن «جاس ۇلان» جانە «جاس قىران» ۇيىمىنىڭ سيمۆوليكاسىن تاقتى. قالىقتاعان قىران بەينەلەنگەن كوك بەلگى، اسپان جانە مەملەكەتتىك تۋ تۇستەس گالستۋك، دەمەك سيمۆوليكاعا لايىقتى قۇرمەتپەن قاراۋ كەرەك.
پاندەميا اياقتالعاننان كەيىن بۇل «جاس قىراندىقتاردىڭ» العاشقى سالتاناتتى جيىنى. ۇيىم وسكەلەڭ ۇرپاقتى جوعارى ادامگەرشىلىك-رۋحاني قۇندىلىقتار، تولەرانتتىلىق، دەموكراتيالىق جانە ءوزارا تۇسىنىستىك مادەنيەتى قاعيداتتارى نەگىزىندە وتانسۇيگىشتىككە تاربيەلەيدى.
«ۇيىم قازاقستان حالقىنىڭ تاريحىن، مادەنيەتىن، ءتىلىن ءبىلۋ نەگىزىندە رۋحاني الەۋەتتى قالىپتاستىرۋعا جاۋاپتى، وقۋشىلاردىڭ قوعامدىق بەلسەندىلىگىن، تانىمدىق بەلسەندىلىگىن ارتتىرۋ، بالالاردىڭ شىعارماشىلىعى مەن الەۋمەتتىك باستامالارىن دامىتۋمەن اينالىسادى. مەكتەپ ومىرىندەگى ەرەسەكتەر مەن بالالار اراسىنداعى قارىم-قاتىناستى ۇيلەستىرۋگە جاۋاپتى. سونداي-اق بالالار مەن جاسوسپىرىمدەر ۇيىمدارى مەملەكەتتىك جانە قوعامدىق قۇرىلىمدارمەن، ۇەۇ-مەن الەۋمەتتىك ارىپتەستىكتە العاشقى قادامدار جاساپ جاتىر»، - دەيدى N87 ورتا مەكتەپ ديرەكتورى ۇلار مىلتىقبايەۆا.
ۇيىم قىزمەتىنىڭ قورىتىندىسى جىل سايىن شىعارىلادى، مەكتەپتىڭ ۇزدىك جاس ۇلاندىقتارى جالپى مەكتەپتىك، وبلىستىق، رەسپۋبليكالىق «جاس ۇلان» كەڭەسىنە مۇشە بولا الادى. وقۋ جىلىنىڭ سوڭىندا ۇزدىك بىرلەستىككە «ۇزدىك توپ» اتاعى مەن ديپلومى، سونىمەن قاتار قازاقستاننىڭ تاريحي جەرلەرىنە ساياحات نەمەسە جازعى ساۋىقتىرۋ لاگەرىنە جولداما بەرىلەدى. وقۋدا جانە قوعامدىق جۇمىستا ەرەكشە جەتىستىكتەرگە جەتكەن مەكتەپ وقۋشىلارى «جاس ۇلان» التىن كىتابىنا ەنەدى. ەڭ بەلسەندىلەر كورنەكتى قوعام جانە ساياسي قايراتكەرلەرمەن كەزدەسۋگە، ترەنينگتەرگە، سەمينارلارعا جانە ەلدەگى ەڭ جاقسى لاگەرلەردە كوشباسشىلىق ساباققا قاتىسۋعا مۇمكىندىك الادى.
«جاس ۇلان» جانە «جاس قىران» ءبىرىڭعاي بالالار مەن جاسوسپىرىمدەر ۇيىمى» رەسپۋبليكالىق قوعامدىق بىرلەستىگى 2011 جىلى قۇرىلعان.