رايىمبەك اۋدانىنداعى جالعىز اۋداندىق اۋرۋحاناعا كۇردەلى جوندەۋ جاسالماعان
الماتى وبلىسى نارىنقول اۋىلىنىڭ تۇرعىندارى ساۋاتتى مەديسينا ماماندارىنىڭ جوعىن ايتادى. اۋىل تۇرعىندارى سىرقاتىمىزعا ەم سۇراپ بارساق، دارىگەرلەر ۇيالى تەلەفونعا قاراپ وقىپ بەرەدى دەيدى. ودان بولەك، 40 مىڭ حالقى بار رايىمبەك اۋدانىنداعى جالعىز اۋداندىق اۋرۋحاناعا ءالى كۇردەلى جوندەۋ جاسالماعان، دەپ حابارلايدى Almaty-akshamy.kz الماتى ارناسىنا سىلتەمە جاساپ.
«ايتەۋىر دياگنوزدى ۇيالى تەلەفونعا قاراپ قويادى. وزدەرى اۋرۋدى تابا المايدى عوي. وقىماعان، تۇك بىلمەيدى. وقىعان ءبىلىمى جەتەتىندەر كەلسە عوي»، – دەدى نارىنقول اۋىلىنىڭ تۇرعىنى الىبەك دالدەنبايەۆ.
تۇرعىنداردىڭ ايتۋىنشا، اۋىلعا كەلگەن ماماندارعا جاعداي جاسالمايدى. سول سەبەپتى بىلىكتى مامان جوق.
«جاستار مەيىربيكەنىڭ وقۋىن وقىپ كەلەدى. ال دارىگەرلەردىڭ سانى شەكتەۋلى. مەنىڭ انامنىڭ ءوزى اۋرۋحانادا ىستەيدى. ساۋاتسىز دارىگەرلەر دە بار دەپ ايتىپ جاتادى. سول ءۇشىن اۋىلعا ساۋاتتى مامان كەرەك، ولارعا جاعداي جاساۋ كەرەك»، – دەدى نارىنقول اۋىلىنىڭ تۇرعىنى اسەل سوۆەتباي.
اۋىل جۇرتى ارىزىن ايتقان رايىمبەك اۋداندىق ورتالىق اۋرۋحاناسىنىڭ احۋالى سىن كوتەرمەيدى. تۇرعىنداردىڭ ايتۋىنشا، 1989 جىلى سالىنعان بۇل مەديسينالىق مەكەمەگە ءالى كۇنگە كۇردەلى جوندەۋ جاسالماعان. ەلدىڭ ەم-دومىنا جاراپ تۇرعان ەسكى ەمحانانىڭ قازىرگى جاعدايىن ونداعى قىزمەتكەرلەر دە جاسىرمايدى. جاۋىن جاۋسا توبەدەن سۋ تامشىلاپ، جەل سوقسا شاتىرى ۇشادى ەكەن.
«جاڭبىر بولعان كەزدە اناۋ 3-4 قاباتتى سۋ باسىپ كەتەدى. مەن حيرۋرگيا بولىمىندە ىستەيمىن عوي. سۋ تامشىلايدى. ىشىنە دەيىن كىرەدى. باسپالداقتارعا شەلەك قويىپ قويادى»، – دەدى شجق «رايىمبەك اۋداندىق اۋرۋحاناسى» كمك حيرۋرگيا ءبولىمىنىڭ قىزمەتكەرى جانار اقبايەۆا.
«تەراپيەۆت، حيرۋرگ، گينەكولوگ كەلسە جەتكىلىكتى دەپ ويلايمىن. جوق، جالاقى از ەمەس، مۇمكىن، كەلگەن مامانعا ءۇي بەرۋ كەرەك شىعار. جاستاردىڭ اۋىلعا تۇرعىسى كەلمەيدى عوي. جوندەۋ جۇمىستارى جاسالادى دەگەن، ءبىراق ءالى جاسالعان جوق. ال مامانداردىڭ بىلىمىنە كەلسەك، ءبارى ءبىلىمدى دەپ ويلايمىن»، – دەدى شجق «رايىمبەك اۋداندىق اۋرۋحاناسى» كمك باس مەيىربيكەسى نازگۇل مەرجانوۆا.
الماتى وبلىسىنىڭ اكىمى مارات سۇلتانعازييەۆتىڭ رايىمبەك اۋدانىنا ءىسساپپارى بارىسىندا اتالعان اۋدانداعى 1 اۋرۋحانا مەن 5 دارىگەرلىك امبۋلاتوريانىڭ كۇردەلى جوندەۋدى قاجەت ەتەتىنى ايتىلعان ەدى. وبلىس باسشىسى جاعدايدى كوزبەن كورىپ، ءتيىستى تاراپتارعا تاپسىرما بەرگەنىن اتاپ ءوتتى.