قازاقستاننىڭ باسىم بولىگىندە نايزاعاي وينايدى، كۇن ىستىق بولادى
11 تامىزدا قازاقستاننىڭ 9 وڭىرىندە داۋىلدى ەسكەرتۋ جاريالاندى. سينوپتيكتەر نايزاعاي ويناپ، جاڭبىر جاۋادى، كەي جەردە اپتاپ ىستىق بولاتىنىن ەسكەرتەدى، دەپ حابارلايدى Almaty-akshamy.kz.
سينوپتيكتەردىڭ مالىمەتىنشە، 11 تامىزدا سولتۇستىك قازاقستان وبلىسىنىڭ وڭتۇستىگىندە، شىعىسىندا نايزاعاي ويناپ، بۇرشاق تۇسەدى دەپ كۇتىلەدى. تۇندە جانە تاڭەرتەڭ وبلىستىڭ باتىسىندا تۇمان تۇسەتىنى بولجانادى. كۇندىز وبلىستىڭ وڭتۇستىگىندە سوققان جەلدىڭ ەكپىنى 15-20 م/س جەتەدى.
تاڭەرتەڭ جانە كۇندىز تۇركىستان وبلىسىنىڭ تاۋلى اۋداندارىندا نايزاعاي ويناپ، كۇن كۇركىرەيدى دەپ كۇتىلەدى. سولتۇستىك-شىعىستان سوققان جەل تاڭەرتەڭ جانە كۇندىز تاۋلى اسۋلارىندا 15-20 م/س قۇرايدى، وبلىستىڭ وڭتۇستىگىندە، شىعىسىندا توتەنشە ءورت ءقاۋپى ساقتالادى.
باتىس قازاقستان وبلىسىندا كۇندىز اۋا تەمپەراتۋراسى 37 گرادۋسقا جەتەدى، اتىراۋ وبلىسىندا دا 37 گرادۋس اپتاپ ىستىق كۇتىلەدى. ءوڭىردىڭ سولتۇستىگىندە، سونداي-اق قىزىلوردا وبلىسىندا توتەنشە ءورت ءقاۋپى ساقتالادى. اقتوبە وبلىسىندا دا ىستىق بولادى، سىناپ باعانى 36 گرادۋسقا دەيىن كوتەرىلۋى مۇمكىن.
سينوپتيكتەردىڭ بولجامىنشا، تۇندە قاراعاندى وبلىسىنىڭ سولتۇستىگىندە تۇمان تۇسەدى، سولتۇستىك-شىعىستان جەل سوعادى، نايزاعاي كەزىندەگى ەكپىنى 15-20 م/س جەتۋى مۇمكىن.
جەتىسۋ وبلىسىنىڭ شىعىسىندا جانە تاۋلى اۋداندارىندا بۇگىن، 10 تامىزدا نايزاعاي وينايدى دەپ كۇتىلەدى. باتىستان 15-20 م/س جىلدامدىقپەن جەل سوعادى، كەي تۇستا 25 م/س جەتەدى.
11 تامىزدا كۇندىز اباي وبلىسىنىڭ سولتۇستىگىندە نوسەر جاڭبىر جاۋادى. وبلىستىڭ باسىم بولىگىندە نايزاعاي ويناپ، ءوڭىردىڭ باتىسى مەن وڭتۇستىگىندە بۇرشاق تۇسەدى دەپ كۇتىلەدى. سولتۇستىك-باتىستان سوققان جەلدىڭ ەكپىنى كۇندىز وبلىستىڭ باتىسى مەن وڭتۇستىگىندە 15-20 م/س قۇرايدى.