تۇركياعا ەم ىزدەپ بارعان وتانداستارىمىزعا دەمەۋ بوپ جۇرگەن قانداستار بار.
ىستامبۇلدا تۇراتىن قانداسىمىز نۇرابدۋللاح جادىك ەمىنە شيپا ىزدەپ، شارق ۇرعان جانداردى بارىنشا قولداپ، قولجەتىمدى قىزمەت الۋعا كومەكتەسەدى، دەپ حابارلايدى Almaty-akshamy.kz 24.kz-كە سىلتەمە جاساپ.
نەگىزگى كاسىبى زاڭگەر بولعانىمەن، مەديسينا سالاسىنا قاتىستى جايتتاردى جەتىك مەڭگەرگەن. تاريحي وتانىنان كەلگەندەرگە كومەكتى ۇلتىنا دەگەن قۇرمەت دەپ بىلەدى.
قانداسىمىزدىڭ ءۇش قاباتتى ءۇيى بار. ەسكى بولسا دا، قالانىڭ قاق ورتاسىندا ورنالاسقان. ءۇي يەسى نۇرابدۋللاح جادىك تۇركيادا تۋىپ-وسكەن. 25 جىلدان بەرى زاڭ سالاسىندا جۇمىس ىستەيدى. اتا-اناسى وسىدان 70 جىل بۇرىن انادولى جەرىنە قونىس اۋدارعان. اكەسىنەن قالعان مۇلىكتى ۇلتىنىڭ پايداسىنا جاراتىپ ءجۇر. بۇل جەردى ابدۋل بولدىرعان جاديك ءۇيى دەپ اتاعان. نۇرابدۋللاحتىڭ مەيمانداردان ءبىر عانا قالاۋى بار. ول - باقيلىق بولعان اتا-اناسىنا قۇران باعىشتاپ، يمان كەلتىرۋ.
«بۇل ءۇيدى تەگىن اكەم سالعان. وندا 5 جىل بۇرىن جوندەۋ جۇمىسىن جاسادىم. 4-5 جىل بولىپ قالدى. 50-60-تاي كىسى وسىندا قوناقتاپ كەتتى. جوعارعى قاباتىندا اپكەم تۇرادى. ەكى قاباتىندا ەمدەلۋگە كەلگەندەر قالادى. بالا- شاعاسىمەن كەلسىن، كىممەن كەلسە دە، كەلسىن. ءوزى وسى جاقتا تۇرادى. ىشكى جاققا اكەم مەن شەشەمنىڭ اتىن جازىپ قويدىم»، - دەيدى قانداس نۇرابدۋللاح جادىك.
بۇل ۇيدە ەمدەلۋگە كەلگەن كەز كەلگەن قازاق اقىسىز تۇراقتاي الادى. بىرنەشە جاتىن بولمە، جىلى توسەك بار. ودان بولەك، تەلەديدار تاماشالاپ، تىنىعاتىن جانە اس ازىرلەيتىن مۇمكىندىك قاراستىرىلعان.
«ۇلتىمىز قازاق بولعاننان كەيىن «اكە كورگەن وق جونار، شەشە كورگەن تون پىشەر» دەيدى. ءبىز اكە-شەشەمىزدەن بىر-بىرىمىزگە كومەكتەسۋدى ۇيرەندىك. تەك تۇركيادا ەمەس، دۇنيەدە تارىداي شاشىلعان قازاق بار عوي. ولارعا ءبىزدىڭ قانداي پايدامىز بولادى؟ قانداي كومەگىمىز بولادى؟ قولىمىزداعىنى بىرگە ءبولىپ جەمەسەك، پايدالانباساق، قازاق دەگەنىمىز اتىمىز قايدا»؟ - دەيدى قانداس نۇرابدۋللاح جادىك.
شەتەل اسىپ، دەرتىنە داۋا ىزدەگەن جانعا نۇرابدۋللاحتىڭ اپكەسى دە جول كورسەتىپ، ءجون سىلتەيدى.
«كەلەردە كەيدە جول تابا الماي قالادى. كەيدە باراتىن جەرىنە جالعىز بارا المايدى. سوندا ماعان بىرگە بارايىق پا دەيدى. بىرگە بارامىز. ۇيدە كەيدە تاماق ىستەۋگە شامالارى بولمايدى. سوندا تاماق ىستەپ قويامىن. كەلىنىم بار. كەيدە ءۇيدى تازالاپ كەتەدى. ولاردىڭ اۋىرىپ، اۋرۋحاناعا بارىپ-كەلىپ جۇرگەندە شاماسى كەلمەي قالادى»، - دەيدى اپكەسى نۇريللا جادىك.
جالپى، تۇركيادا جىلىنا تەك 400-دەن استام شەتەلدىككە تەگىن ەمدەلۋ ءۇشىن كۆوتا بولىنەدى. ءبىراق بۇل مۇمكىندىككە كوبىنىڭ قولى جەتە بەرمەيدى. باستى تالاپ – دەرتىنە ەلىندە داۋا تابىلماعانى جونىندەگى انىقتاما كورسەتۋ.
«شەتەل ازاماتتارىنىڭ تۇركيادا ەمدەلۋىنە زاڭ شىعارىلعان. قازاقستاننان كەلەتىن قازاقتاردىڭ پايدالانۋىنا تىلەكتەسپىز. بۇل ءۇشىن «مەنىڭ اۋرۋىما قازاقستاندا ەم تابىلمادى» دەگەن ەمحانادان قۇجات الىپ، ونىمەنەن تۇرىك كونسۋلدىعىنا بارسا بولادى. بۇل زاڭدى قازاقستاندىقتار دا ءبىلىپ، قانداس باۋىرلارىمنىڭ وسىندا ەمدەلۋىنە پايدامىز بولسىن دەپ ايتا كەتەيىن دەدىم»، - دەدى نۇرابدۋللاح جادىك.
«ولار انادولى جەرىنە ساۋىق ىزدەپ، سايران قۋىپ كەلمەيدى. ءبىز دەرتىنە داۋا ىزدەگەندەردى بىردەن تانيمىز»، - دەيدى قانداسىمىز. سوعان ساي پەيىلىن دە تارىلتپاۋعا تىرىسادى. ىستامبۇلعا كورشىلەس جەردە تۇرسا دا، ۇلكەن شاڭىراققا ءجيى ات باسىن بۇرىپ، قوناعىن تورگە وزدىرىپ، قۇرمەتىن كورسەتەدى.