قازاق ۇلتتىق قىزدار پەداگوگيكالىق ۋنيۆەرسيتەتىندە جوعارى ءبىلىم بەرۋ جۇيەسىنىڭ وزەكتى ماسەلەلەرىنە ارنالعان ماڭىزدى باسقوسۋ ءوتتى.
«جوعارى ءبىلىم بەرۋدە دەرەكتەرگە نەگىزدەلگەن شەشىم قابىلداۋ: ينستيتۋسيونالدىق زەرتتەۋلەردەگى قازىرگى ماسەلەلەر مەن بولاشاق باعىتتار» اتتى قازاقستانداعى ينستيتۋسيونالدىق زەرتتەۋلەر بويىنشا III فورۋمدى QyzPU مەن ەلىمىزدىڭ جەتەكشى جوعارى وقۋ ورىندارى — Nazarbayev University، KIMEP University جانە SDU University بىرلەسىپ ۇيىمداستىردى، دەپ حابارالايدى aqshamnews.kz.
ءىس-شاراعا ساراپشىلار، زەرتتەۋشىلەر جانە ءبىلىم بەرۋ ۇيىمدارىنىڭ وكىلدەرى جينالدى. جيىن بارىسىندا ءبىلىم بەرۋ سالاسىنداعى شەشىمدەردى دەرەكتەرگە سۇيەنە وتىرىپ قابىلداۋ قاجەتتىگى، ساپانى ارتتىرۋ جولدارى، حالىقارالىق تاجىريبەنى ەنگىزۋ ماسەلەلەرى كەڭىنەن ءسوز بولدى. فورۋم اياسىندا قاتىسۋشىلارعا ۇزدىك حالىقارالىق تاجىريبەلەر، اناليتيكالىق جۇيەلەر مەن سيفرلىق قۇرالداردى ەنگىزۋدىڭ ناقتى مىسالدارى ۇسىنىلدى.
QyzPU باسقارما تءوراعاسى – رەكتورى گۇلميرا قاناي فورۋمنىڭ جوعارى ءبىلىم بەرۋ جۇيەسىن جاڭعىرتۋداعى ماڭىزىن اتاپ ءوتتى.
«بۇگىنگى فورۋمدا سالا ساراپشىلارى باس قوسىپ، ستۋدەنتتەرگە كورسەتىلەتىن قىزمەت ساپاسىن ارتتىرۋ مۇمكىندىكتەرى تالقىلاندى. سونداي-اق جوعارى ءبىلىم بەرۋ جۇيەسىنىڭ بولاشاعىنا ىقپال ەتەتىن شەشىمدەر قابىلداۋداعى ءوز ءرولىمىز قانداي بولماق دەگەن ماڭىزدى سۇراقتار كوتەرىلدى. الداعى ۋاقىتتا ەلىمىزدىڭ ءاربىر ۋنيۆەرسيتەتىندە وسىنداي اناليتيكالىق زەرتتەۋلەر نەگىزىندە ماڭىزدى باسقارۋ شەشىمدەرى قابىلدانىپ، جوعارى وقۋ ورىندارىنىڭ حالىقارالىق ستاندارتتارعا ساي ترانسفورماسيالانۋىنا مۇمكىندىك تۋاتىنىنا سەنىم بىلدىرەمىز»، – دەدى رەكتور.
فورۋمدا ءبىلىم ساپاسىن ارتتىرۋ ءۇشىن دەرەكتەردى جيناۋ مەن تالداۋدىڭ زاماناۋي ادىستەرى، سيفرلاندىرۋدىڭ ينستيتۋسيونالدىق زەرتتەۋلەردەگى ءرولى، سونداي-اق كادرلىق جانە ادىستەمەلىك ماسەلەلەر كەڭىنەن تالقىلاندى. نازاربايەۆ ۋنيۆەرسيتەتىنىڭ ينستيتۋسيونالدىق زەرتتەۋلەر جانە اناليتيكا ءبولىمىنىڭ باسشىسى مەتتيۋ كورتني: «دەرەكتەر – سانالى شەشىم قابىلداۋدىڭ باستى قۇرالى. بۇل فورۋم – ۋنيۆەرسيتەتتەردىڭ تاجىريبە الماسۋى مەن ءبىلىم بەرۋ ساپاسىن جاڭا دەڭگەيگە كوتەرۋدىڭ ناقتى الاڭى»، – دەپ اتاپ ءوتتى.
فورۋمنىڭ ەرەكشەلىگى – تەوريالىق بولىممەن قاتار، پراكتيكالىق وقىتۋ سەسسيالارىنىڭ وتكىزىلۋى بولدى. Microsoft كومپانياسىنىڭ ماماندارى Excel باعدارلاماسىن باسقارۋ مەن دەرەك تالداۋ قۇرالى رەتىندە ءتيىمدى قولدانۋ تاسىلدەرىن ۇيرەتتى. SDU University ساپا مونيتورينگى دەپارتامەنتىنىڭ ديرەكتورى گۋلناز توگۋزبايەۆا فورۋمنىڭ قولدانبالى ماڭىزىن اتاپ ءوتتى.
«بۇل ءىس-شارا قازاقستانداعى جوعارى ءبىلىم بەرۋ سالاسى ءۇشىن وتە ماڭىزدى. ءىس-شارانىڭ باستى ماقساتى – جوعارى ءبىلىم بەرۋ سالاسىندا شەشىم قابىلداۋ ءۇشىن دەرەكتەردى ءتيىمدى پايدالانۋ. قازىرگى تاڭدا ۋنيۆەرسيتەتتەردىڭ سانالى شەشىم قابىلداۋى ءۇشىن ناقتى ماقساتتار قويىپ، ۇزاق مەرزىمدى جەتىلدىرۋ جولىندا ناقتى دەرەكتەرگە سۇيەنۋى قاجەت»، – دەدى ول.
قاتىسۋشىلار ءۇشىن پىكىرتالاس الاڭى كاسىبي وي ءبولىسۋدىڭ، ءبىلىم بەرۋ اناليتيكاسىن دامىتۋداعى وزەكتى ماسەلەلەردى بىرلەسىپ شەشۋدىڭ ءتيىمدى الاڭىنا اينالدى. فورۋم جوعارى ءبىلىم بەرۋدى دەرەكتەر نەگىزىندە باسقارۋدىڭ كەلەشەگىنە باعىتتالعان ناقتى قادام رەتىندە باعالاندى.