9-12 ماۋسىم ارالىعىندا الماتىدا كينوجوبالار كونكۋرسىنىڭ ەكى كەزەڭىنەن ءساتتى وتكەن جوبالاردىڭ پيچينگى وتەدى، دەپ حابارلايدى aqshamnews.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
بيىلعى پيچينگتە 99 جوبا قورعالادى.
قورعاۋ ۇلتتىق كينونى قولداۋ مەملەكەتتىك ورتالىعىنىڭ رەسمي YouTube ارناسىندا تىكەلەي ەفيردە كورسەتىلەدى.
بايقاۋعا قاتىسۋعا ءوتىنىم قابىلداۋ 5 ناۋرىزدا باستالدى. كوركەم، دەرەكتى جانە انيماسيالىق فيلم سەكسيالارىندا 444 جوبا تىركەلدى. باعالاۋ ناتيجەسى بويىنشا 128 جوبا ەكىنشى كەزەڭگە ءوتىپ، قاتىسۋشىلار تولىق قۇجاتتار پاكەتىن ۇسىندى. ناتيجەسىندە 99 كينوجوبا پيچينگكە جولداما الدى.
قاڭتار ايىندا كينو ورتالىعى ۇلتتىق يدەولوگياعا ساي كەلەتىن، وزەكتى ماسەلەلەردى كوتەرەتىن باسىم تاقىرىپتاردى جاريالاعان بولاتىن. اتالعان تاقىرىپتار بويىنشا سەنارييلەر بايقاۋعا قاتىسىپ، مەملەكەتتىك قارجىلاي قولداۋعا ۇمىتكەر بولۋعا مۇمكىندىك الدى. باسىم تاقىرىپتاردىڭ قاتارىندا تاريح، تانىمال تۇلعالار، ايەلدەر مەن بالالاردىڭ قۇقىعىن قورعاۋ، تابيعي بايلىقتى ساقتاۋ، ەكولوگيا جانە تۋعان ولكەنىڭ كوركەم تابيعاتى بار.
ايتا كەتەيىك، كينوجوبالاردى ىرىكتەۋ كونكۋرسى بارىسىندا استاناداعى ورتالىق كەڭسەدە، تەلەفون، وففلاين كەزدەسۋ جانە الەۋمەتتىك جەلىدەگى كەرى بايلانىس ارقىلى كونسۋلتاسيا جۇمىستارى جۇزەگە استى.