2022 جىلى قۇمار ويىنداردى ۇيىمداستىرۋ جانە ءباس تىگۋ بويىنشا قىزمەتتەر كولەمى 553،6 ملرد تەڭگە بولعان.
بۇل ستاتيستيكا 12 ءساۋىر كۇنى ءماجىلىستىڭ جالپى وتىرىسىندا پرەمەر-مينيستردىڭ ورىنباسارى التاي كولگىنوۆكە جولدانعان دەپۋتاتتىق ساۋالدا كەلتىرىلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
AMANAT پارتياسىنىڭ «قوعامدىق ساياسات ينستيتۋتى» جاساعان الەۋمەتتىك زەرتتەۋدە حالىقتىڭ 73،7 پايىزى لۋدومانياعا قاتتى الاڭداۋلى ەكەنىن جانە بۋكمەكەرلىك كەڭسەلەردىڭ جۇمىسىنا قاتاڭ تىيىم سالۋ قاجەتتىگىن ايتقان.
«بۇگىنگى تاڭدا بۋكمەكەرلىك كەڭسەلەر حالىقتى قۇمار ويىندارعا بارىنشا كوپ تارتۋعا ميلليونداعان تەڭگە جۇمساپ وتىر. ەلىمىزدىڭ جەتەكشى تەلە-راديو ارنالارى سپورت تارانسلياسيالارى كەزىندە بۋكمەكەرلىك كەڭسەلەردى جارنامالاۋدا. قوعامدىق ورىندارداعى لوتەرەيا تەرمينالدارىن جاۋاپتى ورگاندار باقىلاماۋ سەبەبىنەن بۋىنى قاتپاعان ءبۇتىن ءبىر ۇرپاق سول تەمىر تەرمينالداردىڭ قۇرساۋىندا ءجۇر»، - دەدى جاناربەك ءاشىمجان.
وسى ورايدا دەپۋتات قارىزعا قارىز جاماپ، قۇمار ويىن ءۇشىن شاعىن نەسيە الىپ وينايتىنداردىڭ قاتارى كوبەيگەنىن العا تارتتى.
«ەل بولامىن دەسەڭ، بەسىگىڭدى تۇزە» دەيدى. بەسىگىمىز – جاستار! ال جاستارىمىز ەسىگى ايقارا اشىق قۇمار ويىنداردىڭ وشاعىنداعى وتقا جىلىنىپ ءجۇر. قۇمار ويىن دەگەنىمىز – قىپ-قىزىل وت! ول وت بۇگىن ۇرپاعىمىزعا اۋىز سالسا، ەرتەڭ قوعامىمىزدى ورتكە ورايدى»، - دەپ ويىن جەتكىزدى جاناربەك ءاشىمجان.
دەپۋتاتتار ۇكىمەتتەن مىنا ناقتى ءىس-شارالاردى جەدەل تۇردە قولعا الۋىن تالاپ ەتتى:
- قولدانىستاعى نەسيە بويىنشا 3 ايدان استام ۋاقىتتان بەرى تولەم جاساي الماعان تۇلعالاردان ونلاين جانە وفلاين ءباس تىگۋدى قابىلداۋعا قاتاڭ تىيىم سالۋ كەرەك.
- قارجى پيراميدالارىن، ونلاين-كازينولاردى جانە باسقا دا قۇمار ويىنداردى جارنامالاۋ زاڭمەن قۋدالانۋ كەرەك.
- سۋپەرماركەتتەر مەن قوعامدىق ورىنداردا سامساپ تۇرعان «Lotomatic» سەكىلدى ءارتۇرلى لوتەرەيا تەرمينالدارىن ورناتۋعا جانە لوتەرەيا بيلەتتەرىن تاراتۋعا قاتاڭ تىيىم سالۋ كەرەك.